ប៉ះពាល់ណាស់! កម្ពុជាថយចុះភ្ញៀវទេសចរបរទេស៦០%ដោយសារកូរ៉ូណា
តាមប្រសាសន៍ពីសម្ដេច តេជោ ហ៊ុន សែន នាយករដ្ឋមន្ត្រីកម្ពុជា នៅក្នុងឱកាសថ្លែងសារពិសេសមួយជូនជនជាតិខ្មែរទាំងអស់ ពាក់ព័ន្ធស្ថានភាពថ្មីៗចុងក្រោយ សម្តេចតេជោ បានថ្លែងថា ជំងឺ Covid-19 បានប៉ះពាល់ដល់ផ្នែកសំខាន់ៗរបស់កម្ពុជា ក្នុងនោះវិស័យចំនួន ២ ប៉ះពាល់ធ្ងន់ជាងគេ គឺទី១ វិស័យទេសចរណ៍ និងទី២ វិស័យកាត់ដេរ ដោយសារខ្វះវត្ថុធាតុដើម។
ថ្លែងនៅក្នុងឱកាសនោះ សម្ដេចតេជោនាយករដ្ឋមន្ត្រី មានប្រសាសន៍លើកឡើងថា ភ្ញៀវទេសចរណ៍បរទេសដែលមកកាន់ប្រទេសកម្ពុជា បានធ្លាក់ចុះប្រមាណ ៦០ភាគរយ ក្នុងនោះភ្ញៀវទេសចរណ៍ចិនបានធ្លាក់ចុះរហូតដល់ ៩០ភាគរយ ដោយសារតែការផ្ទុះឡើងនៃវីរុសកូរ៉ូណាថ្មី ( Covid-19)។ សម្ដេចបានបន្តថា រាជរដ្ឋាភិបាលបានដាក់ចេញវិធានការដើម្បីជួយដល់វិស័យទេសចរ ដោយលើកលែងពន្ធលើផ្ទះសំណាក់ និងសណ្ឋាគារ រយៈពេល៤ខែ គឺមានន័យថា រដ្ឋាភិបាលជាអ្នកបង់ពន្ធជំនួសផ្ទះសំណាក់ និងសណ្ឋាគារទាំងនោះ។
យោងតាមគ្រឹះស្ថានអង្គរ ក្នុងរយៈពេល ១ខែ ដើមឆ្នាំ២០២០នេះ ចំនួនភ្ញៀវទេសចរបរទេសដែលបានទិញសំបុត្រចូលទស្សនាតំបន់អង្គរមានចំនួន ២៣៤,៩៣៧នាក់ ពោលគឺមានការថយចុះជាង ២៦ភាគរយ បើប្រៀបធៀបនឹងរយៈពេលដូចគ្នាកាលពី ខែមករាឆ្នាំ២០១៩ ដែលមានភ្ញៀវបរទេសចំនួន ២៧១,០៥០នាក់៕
ដោយ៖ ជួប ស្រីរ័ត្ន
