នាវាផ្ទុកយន្តហោះអាមេរិកដែលចូលចតនៅវៀតណាម មានអ្នកឆ្លងកូវីដកើនដល់ជាង ៤០០នាក់
នាវាផ្ទុកយន្តហោះរបស់សហរដ្ឋអាមេរិក USS Theodore Roosevelt ដ៏ធំមួយ ដែលមានបុគ្គលិកកងទ័ព ៤៨០០នាក់ បើគិតមកដល់ពេលនេះ មានកងទ័ពប្រមាណ ៤១៦នាក់ត្រូវបានធ្វើតេស្តរកឃើញវីរុសកូវីដ១៩ ខណៈលោកវរនាវីត្រីនាវានោះ បានលែលែងពីតំណែង។
បច្ចុប្បន្ននាវា ផ្ទុកយន្តហោះនេះបាននិងកំពុងចតនៅកោះ Guam ខណៈត្រឹមតែមួយថ្ងៃ គឺថ្ងៃព្រហស្បតិ៍ម្សិលមិញរកឃើញ ១៣០ករណីទៀត។ កាលពីមួយ ខែមុននេះ នាវានេះ បានមកកាន់សមុទ្រវៀតណាម ដើម្បីបង្ហាញពីការរឹតចំណងសាមគ្គីភាព នៃកងទ័ពជើងទឹកនៃប្រទេសទាំងពីរ ខណៈអាមេរិក និងវៀតណាម រំលឹកខួប ២៥ឆ្នាំនៃចំណងទាក់ទងការទូតឡើងវិញ ក្រោយពីពិភពលោក បញ្ចប់សង្គ្រាមត្រជាក់នៅដើមទសវត្សរ៍ ១៩៩០។ នៅក្នុងដំណើរទស្សនកិច្ចនេះ នាវាដ៏ធំនេះ បានចូលចតនៅមូលដ្ឋានទ័ពជើងទឹកវៀតណាម នៅសមុទ្រវៀតណាម។ តែទោះជាយ៉ាងនេះក្ដី មិនមានការការបញ្ជាក់ឱ្យបានច្បាស់ថា កងទ័ពនៅលើនាវានេះឆ្លងមេរោគកូរ៉ូណា ដោយមធ្យោបាយអ្វីនោះទេ។ តាមការចោទប្រកាន់មួយចំនួន ប្រហែលជាកងទ័ពមួយចំនួនដើរកម្សាន្ត និងប្រាស្រ័យជាមួយជនជាតិវៀតណាម។
សូមអាន៖ តើពេលណាវិបត្តិជំងឺកូវីដ១៩នៅអាមេរិកវិលត្រឡប់មករកភាពប្រក្រតីវិញ? សូមស្តាប់ Bill Gates និយាយ!
លោកវរនាវីទោ Brett Elliott Crozier មន្រ្តីបញ្ជាការនាវានោះ បានសរសេរលិខិតមួយច្បាប់ស្តីពីការព្រួយកង្វល់ទៅកាន់មេបញ្ជាការរបស់លោក ដោយជំរុញឲ្យពួកគេចាត់វិធានការម៉ឺងម៉ាត់ដើម្បីរារាំងការស្លាប់មកពីមេរោគកូរ៉ូណានេះ។ នេះបើយោងតាមចុះផ្សាយពីវិទ្យុសំឡេងសហរដ្ឋអាមេរិក VOA។ លោក Thomas Modly រដ្ឋមន្រ្តីនាវាស្តីទីដែលបានបណ្តេញលោក Crozier កាលពីថ្ងៃព្រហស្បត៍សប្តាហ៍មុន ក៏បានលាចេញពីតំណែងកាលពីព្រឹកថ្ងៃព្រហស្បត៍ដែរ។ នេះតាម លោក Mark Esper រដ្ឋមន្រ្តីក្រសួងការពារប្រទេសសហរដ្ឋអាមេរិក។
សហរដ្ឋអាមេរិក នឹងមិនបញ្ជូននាវិកទាំងអស់ចេញពីនាវាផ្ទុកយន្តហោះដ៏ធំនេះឡើយ ហើយកងកម្លាំងនាវិកប្រមាណ១ ពាន់ ត្រូវរក្សាទុកឲ្យនៅបន្តប្រតិបត្តិការនៅលើនាវានោះជាដាច់ខាត៕
ដោយ៖ រតនៈវិភូ
ប្រភព៖ CNN, VOA, CBS News
