ប្រទេសអាស៊ាន៥នេះនឹងជាប់ឈ្មោះក្នុងចំណោមមហាអំណាចសេដ្ឋកិច្ចទាំង៣២របស់ពិភពលោកក្នុងឆ្នាំ ២០៥០
នៅក្នុងឆ្នាំ ២០៥០ ខាងមុខ ពិភពលោកទាំងមូលទំនងជាមានការផ្លាស់ប្ដូរយ៉ាងខ្លាំងជាងអ្វីដែលមាននៅពេលបច្ចុប្បន្ននេះ ហើយក្នុងនោះវិស័យសេដ្ឋកិច្ច និងហិរញ្ញវត្ថុរបស់បណ្ដាប្រទេសនានាគឺជាអ្វី ដែលមានការប្រែប្រួលមិនអាចប្រកែកបាន។ ក្រុមហ៊ុនស្រាវជ្រាវរបស់អង់គ្លេស PwC បានស្រាវជ្រាវ និងប្រមើលមើលអនាគតរបស់បណ្ដាប្រទេសទាំងនោះថា តើប្រទេសណាខ្លះមានឥទ្ធិពលខ្លាំងជាងគេ និងជាមហាអំណាចសេដ្ឋកិច្ចនៅក្នុងរយៈពេល ៣០ឆ្នាំរាប់ចាប់ពីពេលនេះតទៅ?
ក្នុងរបាយការណ៍របស់ខ្លួនដែលមានចំណងជើងថា “ ទស្សនៈវែងឆ្ងាយ ឬ The Long View៖ តើបទដ្ឋានសេដ្ឋកិច្ចសកលលោកនឹងផ្លាស់ប្ដូរយ៉ាងដូចម្ដេចនៅឆ្នាំ ២០៥០?” ក្រុមហ៊ុននេះបានធ្វើចំណាត់ថ្នាក់ប្រទេសចំនួន ៣២ ដោយមានទំហំផលិតផលក្នុងស្រុកសរុប (GDP) ធំជាងគេនៅលើពិភពលោកក្នុងឆ្នាំ ២០៥០ ខាងមុខ។ នៅក្នុងនោះមានប្រទេសអាស៊ានចំនួន ៥ ដែលនឹងក្លាយជាមហាអំណាចសេដ្ឋកិច្ចក្នុងចំណោមប្រទេសទាំង ៣២ នេះ។
សូមបញ្ជាក់ថា ទំហំសេដ្ឋកិច្ច GDP របស់បណ្ដាប្រទេសទាំងនេះគិតជា PPP (យុគភាពនៃអំណាចទិញ) តែប៉ុណ្ណោះ។ ប្រទេសអាស៊ានទាំង ៥ នោះរួមមាន៖
៥.ប្រទេសថៃ
ថៃនឹងជាប់ឈ្មោះជាមហាអំណាចសេដ្ឋកិច្ចធំជាងគេបំផុតទី ២៥ នៅក្នុងចំណោមមហាអំណាចសេដ្ឋកិច្ចធំជាងគេបំផុតចំនួន ៣២ នៅក្នុងឆ្នាំ ២០៥០ ខាងមុខ និងធំជាងគេបំផុតទី៥នៅក្នុងតំបន់អាស៊ាន។ ទំហំ GDP (PPP) របស់ខ្លួននៅពេលនោះត្រូវបានគេព្យាករណ៍ថា នឹងមានទំហំ ២,៧៨២ ពាន់ពាន់លានដុល្លារ។
ទីក្រុងបាងកក ប្រភពរូបភាព៖ takemetour
៤.ម៉ាឡេស៊ី
ងាកមកមើលម៉ាឡេស៊ីវិញ ប្រទេសនេះនឹងក្លាយជាមហាអំណាចសេដ្ឋកិច្ចធំជាងគេបំផុតទី ២៤ នៅក្នុងចំណោមមហាអំណាចសេដ្ឋកិច្ចកំពូលៗទាំង ៣២ របស់ពិភពលោក។ ប្រទេសនេះនឹងក្លាយជាមហាអំណាចធំជាងគេបំផុតទី៤នៅក្នុងតំបន់ដែលនឹងមានទំហំ GDP (PPP) សរុប ២,៨១៥ ពាន់ពាន់លានដុល្លារនៅក្នុងឆ្នាំ ២០៥០ ខាងមុខ។
ទីក្រុងកូឡាឡាំពួរឡាំពួរ ប្រភពរូបភាព៖ new7wonders
៣.វៀតណាម
|វៀតណាមដែលស្ថិតនៅជាប់របងកម្ពុជា ហើយកំពុងមានសន្ទុះសេដ្ឋកិច្ចខ្លាំងក្លាគួរឲ្យចាប់អារម្មណ៍នៅពេលបច្ចុប្បន្ន នឹងក្លាយជាមហាអំណាចសេដ្ឋកិច្ចធំជាងគេទី៣នៅក្នុងតំបន់អាស៊ានក្នុងឆ្នាំ ២០៥០ ខាងមុខ។ ដោយជាប់ចំណាត់ថ្នាក់លេខរៀងទី ២០ ជាមហាអំណាចសេដ្ឋកិច្ចធំជាងគេក្នុងចំណោមមហាអំណាចសេដ្ឋកិច្ចទាំង ៣២ ទំហំ GDP (PPP) របស់ប្រទេសកុម្មុយនិស្តមួយនេះត្រូវបានគេព្យាករណ៍ថា នឹងកើនឡើងដល់ ៣,១៧៦ ពាន់ពាន់លានដុល្លារនៅក្នុងរយៈពេល៣០ឆ្នាំខាងមុខ។
ទីក្រុងហាណូយ ប្រភពរូបភាព៖ erasmusu
២.ហ្វីលីពីន
ជាមួយនឹងការព្យាករណ៍ថា ទំហំ GDP (PPP) របស់ខ្លួន នឹងកើនឡើងដល់ ៣,៣៣៤ ពាន់ពាន់លានដុល្លារនៅក្នុងឆ្នាំ ២០៥០ ខាងមុខ ហ្វីលីពីននឹងក្លាយជាមហាអំណាចសេដ្ឋកិច្ចធំជាងគេបំផុតទី២នៅក្នុងតំបន់។ ចំណែកនៅលើពិភពលោកវិញ នៅពេលនោះ ប្រទេសនេះនឹងជាប់ចំណាត់ថ្នាក់ជាមហាអំណាចសេដ្ឋកិច្ចធំជាងគេបំផុតទី ១៩ ក្នុងចំណោមមហាអំណាចសេដ្ឋកិច្ចទាំង ៣២ ពោលគឺស្ថិតនៅលើវៀតណាមមួយលេខ។
ទីក្រុងម៉ានីល ប្រភពរូបភាព៖ theitalianeyemagazine
១.ឥណ្ឌូណេស៊ី
ដោយឡែកត្រឡប់មកមើលឥណ្ឌូណេស៊ីវិញ អនាគតសេដ្ឋកិច្ចរបស់ប្រទេសនេះនឹងកាន់តែខ្លាំងក្លាជាងពេលបច្ចុប្បន្ន ត្បិតអី ទំហំសេដ្ឋកិច្ចរបស់ខ្លួននឹងវ៉ាដាច់មហាអំណាចសេដ្ឋកិច្ចជាច្រើនទៀតនៅក្នុងឆ្នាំ ២០៥០ ខាងមុខ។ ប្រទេសដែលមានជនជាតិឥស្លាមធំជាងគេបំផុតនៅលើពិភពលោកមួយ នឹងជាប់ចំណាត់ថ្នាក់ក្លាយជាមហាអំណាចសេដ្ឋកិច្ចទី១ក្នុងតំបន់ និងទី ៤នៅលើពិភពលោកដែលទំហំ GDP (PPP) របស់ខ្លួនត្រូវបានគេព្យាករណ៍ថា នឹងកើនឡើងដល់ ១០,៥០២ ពាន់ពាន់លានដុល្លារ៕
ទីក្រុងហ្សាការតា ប្រភពរូបភាព៖ The Week
ដោយ៖ Kevin
ប្រភព៖ Businessinsider
