ការពិត ៨ យ៉ាងដែលអ្នកអាចមិនបានដឹងពីអ្នកមានជាងគេនៅអាមេរិក
ទ្រព្យសម្បត្តិដ៏ច្រើនមហាសាលរបស់អ្នកមានជាងគេបំផុតនៅអាមេរិកនៅតែបន្តកើនឡើងឥតឈប់ឈរ។ ជាក់ស្ដែង ត្រឹមប៉ុន្មានខែដើមឆ្នាំ ២០២០ នេះ ទ្រព្យសម្បត្តិរបស់មហាសេដ្ឋីអាមេរិកមួយចំនួនបានកើនឡើងរាប់ពាន់លានដុល្លារបន្ថែមទៀត បើទោះបីជាប្រទេសនេះកំពុងរាតត្បាតដោយជំងឺកូវីដ ១៩ ក៏ដោយ។ នេះបើយោងតាមរបាយការណ៍របស់វិទ្យាស្ថានគោលនយោបាយសិក្សាថ្មី "Billionaire Bonanza"។
របាយការណ៍ខាងលើបានធ្វើការវិភាគទៅលើទិន្នន័យរបស់សារព័ត៌មាន Bloomberg (Bloomberg Billionaire Index) និងទិន្នន័យរបស់ទស្សនាវដ្ដី Forbes (Forbes' Global Billionaires) ចាប់តាំងពីឆ្នាំ ១៩៩០ មក។ ជាលទ្ធផល របាយការណ៍នេះបានបង្ហាញលទ្ធផលដូចខាងក្រោម៖
១.មហាសេដ្ឋីអាមេរិកចំនួន ៦១៤ នាក់មានទ្រព្យសម្បត្តិរួមលើសពី ៣ ពាន់ពាន់លានដុល្លារ ខណៈទ្រព្យសម្បត្តិសរុបរបស់មហាសេដ្ឋីទាំងនេះបានកើនឡើងទ្រព្យបន្ថែមទៀតចំនួន ៣ ពាន់លានដុល្លារ ក្នុងរយៈពេលតិចជាងមួយខែប៉ុណ្ណោះនៅកំឡុងពេលជំងឺកូវីដ ១៩ រាតត្បាត។
២.នៅក្នុងចំណោមមហាសេដ្ឋីមានជាងគេបំផុតរបស់អាមេរិកចំនួន ១៧០ នាក់ មានមហាសេដ្ឋី ៣៤ នាក់ត្រូវបានគេមើលឃើញថា ទ្រព្យសម្បត្តិសរុបពួកគេបានកើនឡើងរាប់សិបលានដុល្លារក្នុងកំឡុងប៉ុន្មានខែឆ្នាំ ២០២០ នេះ។ នេះបើយោងតាមរបាយការណ៍ចេញផ្សាយរបស់សារព័ត៌មាន Bloomberg។
៣.ហើយក្នុងចំណោមមហាសេដ្ឋីមានជាងគេបំផុតនៅអាមេរិក មានមហាសេដ្ឋីចំនួន ៨ នាក់មានទ្រព្យសម្បត្តិកើនឡើងលើស ១ ពាន់លានដុល្លារគិតត្រឹមពីថ្ងៃទី ១ ខែមករាដល់ ខែមេសាឆ្នាំ ២០២០ នេះ។
៤.ចាប់តាំងពីលោកប្រធានាធិបតីដូណាល់ត្រាំឡើងកាន់តំណែងជាផ្លូវការកាលពីឆ្នាំ ២០១៧មក មហាសេដ្ឋីអាមេរិកកាន់តែមានជាងមុនចំនួន ១០,៦% ។ នៅពេលនោះមហាសេដ្ឋីអាមេរិកសរុបមានចំនួន ៥៦៥ នាក់ កាន់កាប់ទ្រព្យសម្បត្តិសរុប ២,៧ ពាន់ពាន់លានដុល្លារ ខណៈដែលនៅខែមេសាឆ្នាំ ២០២០ នេះ មហាសេដ្ឋីអាមេរិកបានកើនឡើងដល់ទៅ ៦១៤ នាក់ និងមានទ្រព្យសម្បត្តិសរុប ៣,២ ពាន់ពាន់លានដុល្លារ។
៥.នៅចន្លោះឆ្នាំ ១៩៩០ និង ២០២០ ទ្រព្យសម្បត្តិមហាសេដ្ឋីអាមេរិកទាំងអស់បានកើនឡើង ១,១៣០% ក្នុងឆ្នាំ ២០២០ ពោលគឺលឿនជាង ២១០ ដងបើប្រៀបធៀបទៅនឹងកំណើន ៥,៣៧% នៃទ្រព្យសម្បត្តិគិតជាមធ្យមរបស់ពលរដ្ឋអាមេរិកក្នុងរយៈពេលដូចគ្នានេះ។
៦.ត្រឹមតែមួយទសវត្សចុងក្រោយនេះប៉ុណ្ណោះ ទ្រព្យសម្បត្តិរបស់មហាសេដ្ឋីអាមេរិកបានកើនឡើងជិតទ្វេដង ពោលគឺបានកើនឡើង ៨០,៦% ក្នុងឆ្នាំ ២០២០ នេះ។ ចំនួននេះ គឺកើនឡើងច្រើនជាង ៥ ដងនៃកំណើនទ្រព្យសម្បត្តិគិតជាមធ្យមរបស់ពលរដ្ឋអាមេរិកដែលបានកើនឡើងត្រឹមតែ ១៥,១% ចាប់ពីឆ្នាំ ២០១០ ដល់ ២០១៦។
៧.អ្នកមានជាងគេបំផុតរបស់អាមេរិកចំនួន ៤០០ នាក់បានក្ដោបក្ដាប់ទ្រព្យសម្បត្តិសរុបស្មើនឹងទ្រព្យសម្បត្តិរបស់ពលរដ្ឋក្រីក្រអាមេរិក ៦៤% ឬ មានចំនួនជិតស្មើនឹង ២ភាគ៣នៃទ្រព្យសម្បត្តិសរុបរបស់គ្រួសារពលរដ្ឋអាមេរិកទាំងមូល។ នេះបើយោងតាមការចេញផ្សាយរបស់ទស្សនាវដ្ដី Forbes។
៨.ហើយក្នុងនោះ មហាសេដ្ឋី មានជាងគេបំផុតចំនួន ៣ រូបរបស់អាមេរិកគឺលោក Jeff Bezos លោក Bill Gates និងលោក Warren Buffett បានក្ដោបក្ដាប់ទ្រព្យសម្បត្តិស្មើនឹងទ្រព្យសម្បត្តិសរុបរបស់ពលរដ្ឋក្រីក្រអាមេរិកចំនួនពាក់កណ្ដាលប្រទេស ១៦០លាននាក់។ អ្នកទាំង ៣ មានទ្រព្យសម្បត្តិសរុប ៣០០,៨ ពាន់លានដុល្លារ៕
អត្ថបទទាក់ទង៖
ទោះកូវីដ១៩វាយលុក ទ្រព្យសម្បត្តិមហាសេដ្ឋី៨រូបនេះនៅតែកើនឡើងខ្ទង់ពាន់លានដុល្លារដដែលនៅដើមឆ្នាំ២០២០នេះ
មកមើលមុខមហាសេដ្ឋីល្បីៗ៩រូប បានបរិច្ចាគប្រាក់ម្នាក់ៗប៉ុន្មានដើម្បីចូលរួមទប់ស្កាត់ជំងឺកូវីដ ១៩?
ដោយ៖ Kevin
ប្រភព៖ Businessinsider
