ភាពភ័យខ្លាចចំនួន ៦ ដែលធ្វើឲ្យអ្នកមិនហ៊ានចេញរកស៊ី
ពាក្យមួយឃ្លាធ្លាប់ត្រូវបានគេនិយាយថា ជីវិតខ្លីណាស់ ប្រើពេលវេលាឲ្យនៅសេសសល់ឲ្យមានន័យបំផុត។ វាអាចអនុវត្តបានសម្រាប់មនុស្សគ្រប់គ្នា ក៏ប៉ុន្តែមានមានមនុស្សមិនច្រើនទេដែលបានរស់នៅជាមួយទស្សនៈមួយនេះ។ បើអ្នកសួរថា ហេតុអ្វី? ចម្លើយគឺដោយសារតែមនុស្សទាំងនោះភ័យខ្លាចពេកក្នុងការស្វែងរកក្តីសុបិន្តរបស់ពួកគេ។ នៅក្នុងការរកស៊ី វាក៏មិនខុសគ្នាដែរ។ មនុស្សជាច្រើនតែងស្រមៃចង់រកស៊ី ក៏ប៉ុន្តែការពិតមានតែមនុស្សតិចតួចប៉ុណ្ណោះដែលហ៊ានប្រថុយប្រថានរកស៊ី ហើយសម្រេចគោលដៅរបស់ពួកគេ។
ជាទូទៅ អ្នកដែលបោះបង់ក្តីសុបិនធ្វើជាអ្នករកស៊ីទាំងនោះ ភាគច្រើនភ័យខ្លាចដោយសារតែហេតុផល ៦ចំណុចនេះ៖
១.មិនដឹងថា ត្រូវរកស៊ីចាប់ពីកន្លែងណាទៅ
បញ្ហាដ៏ធំបំផុតមួយរបស់អ្នកចង់រកស៊ីគឺថា មិនដឹងថា តើត្រូវរកស៊ីចាប់ពីកន្លែងណាទៅ? នេះជាហេតុផលមួយដែលធ្វើឲ្យអ្នកទាំងនោះមិនអាចចាប់ផ្តើមចេញ រកស៊ីបានទោះបីជាពួកគេ មានភាពក្លាហានក្នុងការប្រថុយប្រថាន និងមានគំនិតចង់ចាប់ផ្តើមអាជីវកម្មដោយខ្លួនឯងក៏ដោយ។ ជាដំណោះស្រាយ អ្នកគួរតែពិគ្រោះជាមួយនរណាដែលចេញរកស៊ីមុនអ្នក ត្បិតអីពួកគេអាចជួយត្រួសត្រាយផ្លូវអ្នកបាន ដោយសារតែអ្នកទាំងនោះស្គាល់ច្បាស់ និងមានបទពិសោធន៍ក្នុងការរកស៊ី។ ពួកគេអាចប្រាប់អ្នកពីកន្លែងដែលអ្នកអាចចាប់ផ្តើមចេញរកស៊ីបាន។
២.ខ្លាចអ្នកផ្សេងសើចចំអកគំនិតរកស៊ីរបស់អ្នក
មានមនុស្សច្រើនណាស់ដែលមិនមានការប្ដេជ្ញាចិត្តចេញរកស៊ីដោយសារតែពួកគេខ្លាចអ្នកផ្សេងរិះគន់មកលើខ្លួន។ ការភ័យខ្លាចនឹងការរិះគន់របស់អ្នកដទៃនេះ គឺជារឿងពិត ហើយវាស្ថិតនៅក្នុងចិត្តរបស់អ្នកទាំងនោះរាប់ឆ្នាំដែលធ្វើឲ្យពួកគេបោះបង់ក្តីសុបិន្តរបស់ខ្លួនចោលទាំងមិនបានសាកល្បងអ្វីសោះ។ សូមចាំថា ក៏ព្រោះតែអ្នកដទៃសើចចំអកគំនិតរកស៊ីរបស់អ្នកមិនមែនមានន័យថា វាមិនល្អ មិនអាចទៅរួចនោះទេ។ អ្នកត្រូវដឹងថា មុនពេលអ្នកចាប់ផ្តើមចេញរកស៊ី អ្នកអ្នកត្រូវរៀនថ្លឹងថ្លែងគំនិតរិះគន់ទាំងនោះ។ មនុស្សខ្លះបានត្រឹមតែរិះគន់គេទេ មិនអាចធ្វើអ្វី បានទេ ហើយបើអ្នកគិតតែខ្វាយខ្វល់វាពេក អ្នកគ្មានថ្ងៃអាចឈ្មុសឈ្មុលទៅមុខរួចឡើយ។
៣.ខ្លាចបរាជ័យ
ការយកឈ្នះភាពភ័យខ្លាចទៅនឹងបរាជ័យ អាចជាកិច្ចការដ៏លំបាកបំផុតមួយសម្រាប់អ្នករកស៊ី។ មិនថាអ្នកបានត្រៀមខ្លួនល្អប៉ុណ្ណាអ្នកមិនត្រូវមើលរំលងរឿងពិតដែលថា អ្នករកស៊ីជាង ៥០% បានបិទទ្វារទៅវិញនៅ ក្នុងរយៈពេល ៤ឆ្នាំដំបូងក្រោយចាប់ផ្ដើមចេញរកស៊ី។ ទោះបីនេះជារឿងពិតក៏ដោយ ក៏ប៉ុន្តែភាពបរាជ័យនេះក៏ជាឱកាសមួយសម្រាប់អ្នកដើម្បីអភិវឌ្ឍ សមត្ថភាពរកស៊ីរបស់អ្នកឲ្យកាន់តែល្អប្រសើរឡើងផងដែរ។ វាគ្មានការលើកទឹកចិត្តណាមួយធំជាងការភ័យខ្លាចទៅនឹងភាពបរាជ័យទេ។ បើអ្នកអាចបង្វែរវាទៅជាការជំរុញលើកទឹកចិត្ត និងខិតខំប្រឹងប្រែងសម្រាប់អាជីវកម្មរបស់អ្នក ភាពបរាជ័យទាំងនោះគ្រាន់តែជាពេលវេលាកន្លងផុតមួយតែប៉ុណ្ណោះ។
៤.ខ្វះទុនរកស៊ី
ដើម្បីធ្វើឲ្យអាជីវកម្មមួយដំណើរការបាន អ្នកត្រូវការរបស់បីយ៉ាងគឺ គំនិតចាប់ផ្តើមអាជីវកម្ម កម្លាំងដើម្បីអនុវត្តគំនិតរបស់អ្នក និងទុនដើម្បីធានាថា ការចាប់ផ្តើមមុខជំនួញអាចដំណើរការបានដូចការគ្រោងទុក។ ជាអកុសល សមាសធាតុចុងក្រោយជារឿងមួយលំបាកបំផុតសម្រាប់អ្នករកស៊ី។ មនុស្សភាគច្រើនមិនអាចចាប់ផ្ដើមចេញរកស៊ីដោយសារតែខ្វះទុននេះឯង។ ប៉ុន្តែអ្នកនឹងមិនដឹងតម្លៃពិតប្រាកដនៃគំនិតរបស់អ្នកទេ បើអ្នកមិនបានទាក់ទងអ្នកវិនិយោគ។ អ្នកប្រហែលជាមិនអាចជោគជ័យ ទេនៅពេលទាក់ទងពួកគេដំបូងៗ ប៉ុន្តែអ្នកត្រូវតែព្យាយាមបន្តទៀត។ អ្នកត្រូវបន្តខិតខំបង្ហាញគំនិតរបស់អ្នកទៅកាន់អ្នកវិនិយោគទុនជាច្រើនទៀត ហើយប្រសិនបើគំនិតរបស់អ្នកប្លែក និងអស្ចារ្យ មុខជំនួញរបស់អ្នកនឹងទទួលបានការគាំទ្រហិរញ្ញវត្ថុ។
៥.មិនទទួលបានការចាប់អារម្មណ៍ណាមួយពីអ្នកវិនិយោគ
ប្រសិនបើគំនិតធ្វើជំនួញរបស់អ្នក មិនស្ថិតនៅក្នុងវិស័យដែលកំពុងពុះកញ្ជ្រោលនៅក្នុងទីផ្សារ វានឹងមានឱកាសដែលអ្នកនឹងទទួលបានការរិះគន់ច្រើនពីមុខជំនួញរបស់អ្នក។ ប្រសិនបើអ្នកមិនទទួលបានចំណាប់អារម្មណ៍ត្រឡប់មកវិញពីអ្នកវិនិយោគទេ អ្នកនឹងជួបផលលំបាកក្នុងការទទួលបានទុនពី ពួកគេណាស់។ ទោះយ៉ាងណាក៏ដោយ ប្រសិនបើអ្នកជឿជាក់ថា គំនិតរបស់នឹងដំណើរការ ហើយវាក៏អាចទទួលបានចំណាប់ អារម្មណ៍មកវិញពីអ្នកវិនិយោគ នៅក្នុងរយៈពេលយូរទៅមុខ បន្ទាប់មកអ្នកត្រូវរកមើលវិធីផ្សេងទៀតដើម្បីបញ្ចុះបញ្ចូលពួកគេឲ្យវិនិយោគលើគម្រោងរបស់អ្នក។
៦.មិនហ៊ានប្រថុយប្រថាន
គំនិតដ៏ល្អមួយនៃការរកស៊ី គឺអាចកើតមានឡើងពីមនុស្សគ្រប់គ្នា។ ទន្ទឹមនឹងវា ក៏មិនចាំបាច់ទាល់តែអ្នករៀនចប់សាលា Harvard ទើបអ្នកអាចបង្កើតមុខជំនួញរាប់លានដុល្លារបាននោះដែរ។ សូម្បីតែមនុស្សសាមញ្ញម្នាក់ក៏អាចចេញរកស៊ីបានឲ្យតែមានគំនិត ហើយពួកគេអាចផ្ដល់បទពិសោធន៍ល្អៗសម្រាប់អ្នកផ្សេងទៀត។ យ៉ាងណាក៏ដោយ មិនមែនមនុស្សគ្រប់គ្នាសុទ្ធតែអាចសម្រេចក្តីសុបិននេះបានដែរ ហើយពួកគេនៅតែស្ថិតនៅតំបន់ស្រណុកស្រួល (Comfort Zone)។ ចំណុចមួយដែលអ្នកត្រូវស្វែងយល់គឺថា បើអ្នកនៅតែធ្វើរឿងដដែលៗ អ្នកមិនអាចស្គាល់អ្វីដែលថ្មី និងមិនអាចផ្លាស់ប្ដូរខ្លួនឯងបានឡើយ។
ក្នុងនាមជាអ្នករកស៊ី អ្នកត្រូវតែចាកចេញពីតំបន់ស្រណុកស្រួលរបស់អ្នក ហើយចាប់ផ្តើមពីកន្លែងណាមួយពីតូចទៅធំជាមុនសិន។ កន្លែងនោះជាអ្វីដែលអ្នកបានរៀបចំ និងត្រៀមខ្លួនទុកជាមុន ហើយប្រសិនបើវាដំណើរការទៅបាន អ្នកអាចធ្វើដំណើរកាន់តែកៀកទៅកាន់គោលដៅរបស់អ្នកហើយ។ ប៉ុន្តែប្រសិនបើវាមិនដំណើរការនោះទេ យ៉ាងហោចណាស់អ្នកក៏ទទួលបានបទពិសោធន៍ពីវាដែរ៕
អត្ថបទទាក់ទង៖
- មេរៀនទាំង ៩ សហគ្រិនមិនដែលបានរៀនក្នុងសាលា
- ហេតុអ្វីបានជាអ្នកមិនគួរចេញរកស៊ីប្រសិនបើអ្នកមិនអាចឆ្លើយបានថា អ្នកចេញរកស៊ីដើម្បីអ្វី?
ដោយ៖ Kevin
ប្រភព៖ Addicted2success
