សេដ្ឋីអាមេរិកលោក David Bach ៖ «មិនព្យាយាមទិញផ្ទះ គឺជាកំហុសដ៏ធំមួយក្នុងជីវិត»
លោក David Bach គឺជាអ្នកជំនួញ និង ជាអ្នកនិពន្ធដ៏ល្បីរបស់អាមេរិកបានលើកឡើងថា ការមិនទិញផ្ទះគឺជាកំហុសដ៏ធំមួយក្នុងជីវិត។ ការនិយាយបែបនេះ គឺធ្វើឡើងនៅក្នុងបទសម្ភាសន៍ជាមួយនឹងសារព័ត៌មានCNBC។
«ការទិញផ្ទះ គឺជាផ្លូវឆ្ពោះទៅកាន់ភាពស្ដុកស្ដម្ភក្នុងជីវិត»។ លោក David Bachថ្លែងទៅកាន់អ្នកសារព័ត៌មាន។
សេដ្ឋីរូបនេះបញ្ជាក់ថា មានមនុស្សជាច្រើនមិនសូវបានគិតអំពីបញ្ហានេះនោះទេ ហើយបែរជាស៊ូទ្រាំជួលផ្ទះគេ អស់ពេលជាច្រើនឆ្នាំ។ ប៉ុន្តែបើពួកគេខិតខំទិញផ្ទះវិញ ទោះលំបាកបន្តិចតែផ្ទះនោះនឹងក្លាយជាកម្មសិទ្ធិផ្ទាល់ខ្លួន ហើយអាចរស់នៅដោយមានទ្រនំច្បាស់លាស់។
សូមបញ្ជាក់ថា បច្ចុប្បន្ននេះនៅលើពិភពលោកគេប្រើវិធីសាស្ត្របង់រំលស់ដើម្បីទិញផ្ទះហើយបើគិតៗទៅតម្លៃដែលត្រូវបង់ដើម្បីទិញផ្ទះ និង តម្លៃដែលជួលផ្ទះគេដើម្បីរស់នៅនោះមិនខុសគ្នាឆ្ងាយពេកទេ តែបើដើម្បីទិញផ្ទះ នោះប៉ុន្មានឆ្នាំក្រោយមកអ្នកនឹងក្លាយជាម្ចាស់កម្មសិទ្ធិ តែបើចំណាយដើម្បីជួលផ្ទះគេវិញ ប៉ុន្មានឆ្នាំក្រោយមកអ្នកគឺនៅតែជាអ្នកគ្មានផ្ទះដដែល៕
ដោយ៖ រតនា វិចិត្រ
