បើព្រមទទួលស្គាល់ការពិតទាំង៤នេះ នឹងផ្លាស់ប្ដូរជីវិតរបស់អ្នកបាន
អ្នកអាចនឹងជាបុគ្គលជោគជ័យមួយរូប ដែលគ្រប់គ្នាកោតសរសើរនិងគោរព ប៉ុន្តែអ្នកបែរជាយល់ថាជីវិតអ្នកមានចន្លោះប្រហោង មិនមានសេចក្ដីសុខនិងសុភមង្គលពិតប្រាកដទៅវិញ។ មានភាពជោគជ័យហើយ មានទ្រព្យសម្បត្តិហូរហៀរហើយ តើអ្វីទៅជាមូលហេតុនាំឲ្យអ្នកគ្មានសេចក្ដីសុខយ៉ាងដូច្នេះ ? ទោះជាមានមូលហេតុផ្អែកតាមស្ថានការណ៍ផ្សេងៗពីគ្នាបែបណាក៏ដោយ ក៏ឫសគល់នៃមូលហេតុទាំងនោះសុទ្ធតែកើតឡើងដោយសារការមិនបានសង្កេតលើជីវិតដែលចោតជាសំណួរឲ្យអ្នកឆ្លើយ ជាហេតុនាំឲ្យអ្នករៀបលំដាប់ភាពសំខាន់នៅក្នុងជីវិតមិនបានត្រឹមត្រូវ។ តើការទទួលស្គាល់មូលដ្ឋានគ្រឹះនៃការពិតអ្វីខ្លះ ដែលអាចនាំអ្នកទៅរកភាពរុងរឿង និងសុភមង្គលក្នុងជីវិតបាន ?
១) ជ័យជម្នះដ៏អស្ចារ្យសុទ្ធតែមានស្លាកស្នាមនៃភាពបរាជ័យ៖ បើអ្នកមានមន្ទិលសង្ស័យចំពោះបទពិសោធន៍ដ៏មានតម្លៃពីភាពបរាជ័យដែលជាអ្នកបំផុសអ្នកឲ្យទទួលបានជ័យជម្នះក្នុងជីវិត អ្នកអាចសាកពិចារណាពីបុគ្គលដ៏មហិមាក្នុងប្រវត្តិសាស្ត្ររបស់ពិភពលោកគ្រប់ៗរូបទាំងនោះបាន ថាតើទម្រាំទទួលបាននូវកេរ្តិ៍ឈ្មោះដ៏ល្បីរន្ទឺពីសមិទ្ធផលរបស់ពួកគេម្នាក់ៗចូលរួមចំណែកផ្លាស់ប្ដូរពិភពលោកបាន ស្លាកស្នាមនៃភាពបរាជ័យដ៏ជូរចត់អ្វីខ្លះដែលពួកគេបានជួបប្រទះក្នុងជីវិត។ បើអ្នកមិនធ្លាប់ទទួលបានមេរៀនអ្វីពីបទពិសោធន៍បរាជ័យទេនោះ អ្នកមុខជាមិនអាចស្វែងរកច្រកចេញទៅកាន់គោលដៅបាននៅពេលអ្នកជួបបញ្ហានោះឡើយ។
២) ភាពមមាញឹកគឺមិនដូចគ្នាទៅនឹងប្រសិទ្ធភាពនោះទេ៖ តើអ្នកទុកចិត្តភ្នែកអ្នកទេថា រាល់មនុស្សរវល់ទាំងអស់សុទ្ធតែបំពេញការងាររបស់ពួកគេប្រកបដោយប្រសិទ្ធភាពនោះ ? បើអ្នកយល់បែបនេះ នោះអ្នកមិនបានវាយតម្លៃទៅលើបញ្ហាដោយសម្លឹងមើលឲ្យសព្វគ្រប់ជ្រុងជ្រោយនោះឡើយ។ បុគ្គលដែលបំពេញការងារប្រកបដោយប្រសិទ្ធភាពពិតប្រាកដ គឺជាអ្នកដែលដឹងយ៉ាងជាក់ច្បាស់ថាការងារអ្វីមានភាពសំខាន់សម្រាប់ពួកគេបំផុត និងចេះប្រើប្រាស់ពេលវេលាដែលមាន២៤ម៉ោងដូចគ្នានោះប្រកបដោយភាពឈ្លាសវៃ និងផលិតបាននូវទិន្នផលខ្ពស់ជាទីគាប់ចិត្ត។
៣) អ្នករស់នៅជីវិតដែលអ្នកខ្លួនឯងជាអ្នកបង្កើត៖ គ្មាននរណាម្នាក់អាចបំពានមកលើជីវិតអ្នក ធ្វើជាអ្នកកាច់ចង្កូតជីវិតអ្នក ឲ្យអ្នកសម្រេចចិត្តទៅលើរឿងរ៉ាវទាំងឡាយក្នុងជីវិតដោយផ្ទុយពីបេះដូង និងតម្លៃរបស់អ្នកបាននោះឡើយ លុះត្រាណាតែអ្នកប្រគល់អំណាចនោះទៅឲ្យពួកគេប៉ុណ្ណោះ។ អ្នកយល់ថាខ្លួនអសមត្ថភាពនិងគ្មានសេរីភាពក្នុងការប្រឆាំងនឹងការកំណត់របស់អ្នកដទៃមកលើជីវិតអ្នក ដែលតាមការពិតគឺអ្នកខ្លួនឯងទៅវិញទេ ដែលខ្វះភាពក្លាហានគ្រប់គ្រាន់ក្នុងការងើបឈរប្រឆាំង និងដើរតាមបេះដូងរបស់ខ្លួន ប្រថុយប្រថាននឹងគ្រោះថ្នាក់នានា ដែលចាំបាច់សម្រាប់ទទួលបានភាពជោគជ័យក្នុងជីវិតប៉ុណ្ណោះ។
៤) ការផ្លាស់ប្ដូរគឺជារឿងមិនអាចឃាត់ឃាំងបាន និងត្រូវទទួលយក៖ ផ្នត់គំនិតរបស់អ្នកមានមកលើជីវិតពិតជារឿងមួយសំខាន់ណាស់។ កាលណាអ្នកមានចិត្តចង្អៀតចង្អល់មិនទទួលយកការផ្លាស់ប្ដូរដែលមានឥទ្ធិពលក្នុងជីវិត ហើយបើអ្នកនៅតែចចេសរឹងរូសមិនផ្លាស់ប្ដូរផ្នត់គំនិតអវិជ្ជមានដែលចាក់ឫសយ៉ាងក្រាស់ក្រែលក្នុងជីវិតអ្នកហើយនោះទេ នោះអ្នកនឹងប្រៀបបានទៅនឹងមនុស្សល្ងង់ម្នាក់ដែលមិនផ្លាស់ប្ដូរខ្លួនឯង តែបែរជាព្រងើយកន្តើយនឹងការផ្លាស់ប្ដូរ ក៏ព្រោះតែរំពឹងឲ្យការផ្លាស់ប្ដូរនោះផ្លាស់ប្ដូរទៅវិញ។ ផ្ទុយទៅវិញ បើអ្នកបើកចំហចិត្តទូលំទូលាយសម្រាប់ទទួលយកការផ្លាស់ប្ដូរ នោះអ្នកនឹងចាប់ផ្ដើមកត់សម្គាល់ពីការផ្លាស់ប្ដូរវិជ្ជមានទាំងឡាយចូលក្នុងជីវិតអ្នកដោយសន្សឹមៗមិនខាន។ អ្នកត្រូវចាំថា នៅលើលោកនេះគ្មានអ្វីដែលមិនផ្លាស់ប្ដូរនោះទេ គឺមានតែការផ្លាស់ប្ដូរប៉ុណ្ណោះដែលមិនចេះផ្លាស់ប្ដូរ៕
ប្រែសម្រួល៖ ស្រីពៅ ប្រភព៖ cnbc
