ក្រុមហ៊ុនផលិតទូរស័ព្ទលំដាប់លេខ ២ ក្នុងប្រទេសចិនបានផ្តល់រង្វាន់ជាភាគហ៊ុនឥតគិតថ្លៃចំនួន ១,០០០ ហ៊ុនដល់បុគ្គលិករបស់ខ្លួន បើគិតជាទឹកប្រាក់ប្រមាណ ២៤ លានដុល្លារខណៈក្រុមហ៊ុននេះចូលជាក្រុមហ៊ុន Global Fortune 500។

បុគ្គលិកជាង ២,០០០ នាក់បានទទួលភាគលាភជាភាគហ៊ុនកាលពីថ្ងៃ ១៩ កក្កដា ២០២៩ បន្ទាប់ពីថ្ងៃបិទផ្សារហ៊ុន Hong Kong Stock Exchange ក្នុងតម្លៃ ៩.១១ ដុល្លារហុងកុង ស្មើប្រមាណ ១.១៧ ដុល្លារអាមេរិក នេះបើតាមការឲ្យដឹងពីក្រុមហ៊ុន Xiaomi កាលពីថ្ងៃចន្ទកន្លងទៅ។ 

រយៈពេលនៃការផ្តល់ភាគហ៊ុនជូនបុគ្គលិកនេះគឺមានរយៈពេលពេញមួយឆ្នាំ ពោលបើបុគ្កលិកណាចាកចេញពីក្រុមហ៊ុនមុនថ្ងៃទី ១៩ កក្កដា ២០២០ នោះនឹងមិនអាចទទួលបានការបង្វែរជាសាច់ប្រាក់ឲ្យវិញទេ។ 

ក្រុមហ៊ុន Xiaomi ដែលមានមូលដ្ឋាននៅទីក្រុងប៉េកាំងជាប់ចំណាត់ថ្នាក់ទី ៤៦៨ លើបញ្ជីឈ្មោះក្រុមហ៊ុន Fortune Global 500 និងជាប់ចំណាត់ថ្នាក់លេខ ៧ នៅក្នុងសេវាអ៊ីនធឺណេតនិងលក់រាយបន្ទាប់ពីប្រកាសចំណូល ២៦.៤ ពាន់លានដុល្លារនិងប្រាក់ចំណេញសុទ្ធ ២ ពាន់លានដុល្លារកាលពីឆ្នាំមុន។

គួរបញ្ជាក់ថា ក្រុមហ៊ុនបច្ចេកវិទ្យាធំៗជាច្រើនផ្សេងទៀតរបស់ចិនក៏បានចូលរួមក្នុងបញ្ជីដូចជាក្រុមហ៊ុន Huawei Investment and Holding ក្រុមហ៊ុន Alibaba Group Holding (ក្រុមហ៊ុនមេរបស់ South China Morning Post) និងក្រុមហ៊ុន Tencent Holdings ។

ស្ថាបនិកនិងនាយកប្រតិបត្តិក្រុមហ៊ុន Xiaomi លោក Lei Jun បាននិយាយនៅក្នុងលិខិតបើកចំហមួយទៅកាន់និយោជិកថា "ក្នុងនាមជាក្រុមហ៊ុនដែលមានអាយុក្មេងជាងគេក្នុងចំណោមក្រុមហ៊ុន Fortune Global 500 យើងបានឈានដល់ភាពជោគជ័យបន្ទាប់ពីការចាប់ផ្តើមរបស់យើងត្រឹមរយៈពេល ៩ ឆ្នាំ"៕

ដោយ៖ យ៉ាយ៉ា