មេរៀន​វិនិយោគ ការ​សន្សំ​ប្រាក់ និង​ភាព​ក្លាយ​ជា​អ្នកមាន​ដែល​មនុស្ស​ភាគច្រើន​បាន​ត្រឹមតែ​​សោកស្តាយ​



នៅ​ជុំវិញ​អ្នក មាន​មនុស្ស​មិន​ច្រើន​ទេ​ដែល​សម្រេច​បាន​សេរីភាព​ហិរញ្ញវត្ថុ ហើយ​ក្លាយ​ជា​អ្នកមាន។ ដើម្បី​សម្រេច​បាន​ក្តី​សុបិនមួយ​នេះ លុះត្រា​តែ​អ្នក​បាន​ធ្វើ​អ្វី​ម្យ៉ាង​ដែល​​នោះ​គឺ​ត្រូវ​មាន​មូលដ្ឋានគ្រឹះ​​ចំណេះដឹង​ហិរញ្ញវត្ថុ។ វា​ជា​ចំណេះដឹង​ដែល​សាលា​ភាគច្រើន​មិន​បាន​បង្រៀន​អ្នក​ឡើយ។

នៅ​ខាងក្រោម​នេះ អ្នក​នឹង​បាន​រៀន​ពី​មេរៀន​វិនិយោគ ការ​សន្សំ​ប្រាក់ និង​ភាព​ក្លាយ​ជា​អ្នកមាន​ដែល​មនុស្ស​ភាគច្រើន​បាន​ត្រឹមតែ​​សោកស្តាយ​ប៉ុណ្ណោះ៖ ​

១. បើ​គោលដៅ​របស់​អ្នក​ចង់​ក្លាយ​ជា​អ្នកមាន ត្រូវ​ធ្វើ​ការ​ឲ្យ​ខ្លួនឯង
សូម​ពិនិត្យ​មើល​អ្នក​បញ្ជី​ឈ្មោះ​​មហាសេដ្ឋី​កំពូលៗ​ក្នុង​លោក​មើល៍ តើ​អ្នក​អ្នក​ទាំង​នោះ​សុទ្ធតែ​ធ្វើ​ការ​ឲ្យ​គេ​មាន​ដែរ​ឬទេ? លើកលែង​តែ​អ្នក​ឈ្នះ​ឆ្នោត​ជាតិ​អាមេរិក​ចេញ​ ក្រៅ​ពី​នោះ អ្នក​ទាំងនោះ​សុទ្ធតែ​អ្នក​ជំនួញ​មាន​លុយ​ហូរហៀរ​ចេញ​ពី​​មុខ​របរ​រកស៊ី​ដោយ​ខ្លួនឯង។ រឿង​ដ៏​សាមញ្ញ​គឺ​ត្រង់​ថា នៅ​ពេល​អ្នក​ធ្វើ​ការ​ឲ្យ​គេ អ្នក​នឹង​មិន​ដែល​​រក​ចំណូល​បាន​ច្រើន​ជាង​ម្ចាស់​ក្រុមហ៊ុន​នោះ​ទេ។ ម្យ៉ាង​ទៀត ទោះ​ក្រុមហ៊ុន​នោះ​ចំណេញ​កប់​ក្ដោង ក៏​ប្រាក់​ខែ​របស់​អ្នក​នៅ​ថេរ ឬ​ឡើង​បាន​តាម​អ្វី​ដែល​គេ​កំណត់​ឲ្យ​តែប៉ុណ្ណោះ។ 

ការ​ចាប់​ផ្តើម​ជំនួញ​ខ្លួន​ឯង មិន​ចាំបាច់​លាឈប់​ពី​ការងារ​ពេញ​ម៉ោង​របស់​អ្នក​​ភ្លាមៗ​ទេ។ អ្នក​ត្រូវ​ឆ្លៀត​ពេល​ទំនេរ​ពី​ការងារ​​ពេញ​ម៉ោង មក​ផ្ដោត​ជំនួញ​របស់​អ្នក ហើយ​នៅ​ពេល​វា​រឹងមាំ​អាច​ថា ដក​ខ្លួន​ពី​ការងារ​ពេញ​ម៉ោង​បាន​ ចាំ​លាឈប់​ក៏​បាន។ ​​​

២. ចំណាយ​ពេល​ផ្ដោត​លើ​ចំនួន​ប្រាក់​ដែល​ត្រូវ​សន្សំ
នៅ​ពេល​អ្នក​​វិនិយោគ ឬ​ធ្វើ​ការ​យក​​ប្រាក់ខែ អ្នក​មិន​អាច​គ្រប់គ្រង​វា​​ឲ្យ​ចំណេញ​កាន់តែ​ច្រើន ឬ​ចង់​ឲ្យ​ថៅកែ​ឡើង​តាម​ចិត្ត​ចង់​របស់​អ្នក​បានទេ។ ប៉ុន្តែ​អ្វី​ដែល​អ្នក​អាច​គ្រប់គ្រង​បាន​គឺ​ការ​សន្សំ​ប្រាក់​។ វិធី​សន្សំ​ប្រាក់​គឺ​ថា បើ​អ្នក​កាន់តែ​ឆាប់​សន្សំ គោលដៅ​​កសាង​ទ្រព្យសម្បត្តិ​ក៏​កាន់តែ​ឆាប់​សម្រាប់​អ្នក​ដែរ។ 

អ្នក​​អាច​បង្កើន​ប្រាក់​សន្សំ​របស់​អ្នក​​កាន់តែ​ច្រើន​តាម​រយៈ​​ការ​ករ​វិធីសាស្ត្រ​កាត់​បន្ថយ​ការ​ចំណាយ ឬ ​ខំ​រក​ប្រភព​ចំណូល​បន្ថែម។ បើ​ចំណូល​របស់​អ្នក​កាន់តែ​ច្រើន កុំ​ភ្លេច​សន្សំ​ឲ្យ​បាន​កាន់តែ​ច្រើន​​តាម​% នៃ​​ចំណូល​របស់​អ្នក ទើប​វិនិយោគ​លុយ​ដែល​បាន​សន្សំ​នោះ។ 

៣. ខ្ចី​លុយ​​តែ​នៅ​ពេល​ចាំបាច់​ប៉ុណ្ណោះ
នៅ​ក្នុង​ការ​សម្រេចចិត្ត​ហិរញ្ញវត្ថុ​ជា​ច្រើន កូនសោ​សំខាន់​របស់​អ្នក​គឺ​ត្រូវ​បែងចែក​រវាង​អ្វី​ទៅ​ដែល​ចាំបាច់ និង​អ្វី​ទៅ​ដែល​ចង់​បាន (មិន​ចាំបាច់)។ អ្នក​ត្រូវ​រស់​​​នៅ​ក្នុង​ជីវិត​មួយ​ដែល​​ចាយ​លុយ​ត្រូវ​ខ្នាត។ ការ​ខ្ចី​លុយ​ទៅ​ទិញ​ផ្ទះ​ គឺ​ជា​រឿង​ល្អ ប៉ុន្តែ​ការ​ខ្ចី​លុយ​ទៅ​ទិញ​បំណុល​ដូច​ជា រថយន្ត ឬ​បង់​រំលោះ​ឧបករណ៍​ផ្សេងៗ​ដែល​មិន​ចាំបាច់ គឺ​មិនមែន​ជា​គំនិត​ឆ្លាតវៃ​ផ្នែក​ហិរញ្ញវត្ថុ​ទេ។ សូម​ចាំ​ថា កុំ​ហ៊ាន​ចំណាយ​លុយ ហក់លោត​ហួស​សមត្ថភាព​​ចំណូល​របស់​អ្នក។ ត្រូវ​លៃលក​ធ្វើ​ម៉េច​​ចំណាយ​ឲ្យ​តិច​ជាង​ចំណូល​ជានិច្ច​បើ​មិន​ដូច្នេះ​ទេ អ្នក​នឹង​ធ្លាក់​ចូល​បំណុល​នៅ​ថ្ងៃ​ណាមួយ​មិន​ខាន។

៤. ការ​វិនិយោគ​ដ៏​ល្អ​បំផុត​គឺ​ខ្លួន​ឯង
តើ​ការ​វិនិយោគ​អ្វី​​ដែល​អាច​ធានា​បាន​ផល​ចំណេញ​ច្រើន​បំផុត​ត្រឡប់​មក​វិញ? គឺ​ខ្លួន​​ឯង។ ខិតខំ​អភិវឌ្ឍ​ជំនាញ​របស់​អ្នក ពង្រីក​បណ្ដាញ​ទំនាក់ទំនង និង​ដុសខាត់​ចំណេះដឹង​​អាជីព​ការងារ​ឲ្យ​កាន់តែ​មុត​ស្រួច។ ការ​វិនិយោគ​បែប​នេះ វា​មិន​ងាយ​បាន​ផល​មក​វិញ​ភ្លាមៗ​ទេ ប៉ុន្តែ​វា​បាន​ផ្តល់​ប្រាក់​ចំណេញ​មក​ឲ្យ​អ្នក​បាន​យូរអង្វែង។ វិនិយោគ​ប្រភេទ​នេះ អ្នក​ពិត​ជា​អាច​គ្រប់គ្រង​វា​បាន ដែល​ជា​មូលដ្ឋានគ្រឹះ​នៃ​ការ​កសាង​ភាព​មាន​បាន​នៅ​ពេល​អនាគត៕

ប្រភព៖ Inc 

X
5s