Bill Gates សារភាពថា លោកច្រណែន Steve Jobs ត្រង់ចំណុចមួយនេះ!
កាលលោក Steve Jobs នៅមានជីវិត លោក និង Bill Gatesគឺជាមហាសេដ្ឋី ២ រូបគាត់ដែលល្បីល្បាញជាងគេនៅលើពិភពលោកដែលតែងតែប្រកួតប្រជែងគ្នាទៅវិញទៅមកខាងមុខជំនួញក្នុងវិស័យបច្ចេកវិទ្យា។ ទោះបីជាបែបនេះក្តី អ្នកទាំងពីរនៅតែអាចបង្កើតមិត្តភាពដ៏ល្អមួយដែលមានការផ្តល់តម្លៃ និងគោរពគ្នាទៅវិញទៅមករហូតដល់លោក Steve Jobs បានទទួលមរណភាពក្នុងឆ្នាំ ២០១១ ។
ជារឿយៗលោក ស្ថាបនិកក្រុមហ៊ុន Microsoft រូបនេះតែងតែកោតសរសើរពីគុណសម្បត្តិរបស់លោក Steve Jobs នៅពេលកន្លងមកចំពោះគុណភាពជាអ្នកដឹកនាំ និងសមត្ថភាពមិនធម្មតាក្នុងការលើកទឹកចិត្តបុគ្គលិករបស់ស្ថាបនិកក្រុមហ៊ុន Apple រូបនេះ ។ ក៏ប៉ុន្តែ នៅក្នុងបទសម្ភាសន៍ថ្មីមួយទៅកាន់កាសែត The Wall Street Journal លោក Gates បានសារភាពថា លោក Steve Jobs មានលក្ខណសម្បត្តិពិសេសមួយដែលធ្វើឲ្យលោកនៅតែច្រណែន។
បើតាមការលើកឡើងរបស់លោក Bill Gates លោកថា លោកប្រឹងប្រែងខ្លាំងណាស់ដើម្បីធ្វើយ៉ាងណាឲ្យក្លាយជាអ្នកនិយាយសាធារណៈដ៏ពូកែម្នាក់នៅក្នុងអាជីពរបស់លោក។ ក៏ប៉ុន្តែជំនាញមួយនេះមើលទៅបែរជារឿងមួយងាយស្រួលទៅវិញសម្រាប់លោក Steve Jobs។
« Steve Jobs ប៉ិនប្រសព្វខាងនិយាយណាស់។ ជំនាញនេះហើយដែលធ្វើឲ្យគាត់អាចលក់ផលិតផលរបស់គាត់ដាច់មិនថា ផលិតផលអីក៏ដោយ»។ នេះជាការគូសបញ្ជាក់របស់លោក Bill Gates។ លោកបានមានប្រសាសន៍បន្តដោយសង្ឃឹមថា លោកនឹងអាចរៀនសូត្រពីអតីតមិត្តភក្ដិ និងគូប្រជែងរបស់លោករូបនេះបានតាមរយៈយុទ្ធនាការផ្សេងៗជាពិសេសទាក់ទងទៅនឹងកម្មវិធីសប្បុរសធម៌ជាមួយភរិយារបស់លោកគឺលោកស្រី Melinda ។
លោកBill Gates បានថ្លែងដូច្នេះទៀតថា« ខ្ញុំសង្ឃឹមថា ខ្ញុំនឹងអាចធ្វើដូចគាត់ ពីព្រោះខ្ញុំចង់ឲ្យសម្ដីរបស់ខ្ញុំមានឥទ្ធិពលដូចគាត់ដែលធ្វើឲ្យសាធារណជនចាប់អារម្មណ៍ ជាពិសេសទាក់ទងទៅនឹងបញ្ហាសាកលដែលយើងកំពុងជួបប្រទះ»៕
ប្រភព៖CNBC
