កំពូលសុភាសិតចំនួន១០ឃ្លា របស់ចិនបុរាណដែលប្រកបដោយគតិបណ្ឌិតស៊ីជម្រៅ
ចិនបុរាណមានសុភាសិតមួយបានពោលថា «សុខចិត្តធ្វើជាត្បូងដែលមានចំណុចខ្វះខាតប្រសើរជាងធ្វើជាដុំថ្មមួយដុំដែលមិនមានចំណុចខ្វះខាតអ្វីសោះ។» មនុស្សយើងមិនដែលឃើញអ្វីៗនៅក្នុងរូបភាពពេញលេញនោះទេ។ ពួកគេច្រើនតែឃើញតែមួយផ្នែកនៃរឿងរ៉ាវទាំងឡាយនៅក្នុងជីវិត។ ពួកគេច្រើនតែសម្លឹងឃើញនរណាម្នាក់នោះមានជីវិតយ៉ាងល្អឥតខ្ចោះ ដែលការមើលឃើញតែមួយផ្នែកនេះ បាននាំឲ្យពួកគេយល់ច្រឡំថានៅលើលោកមានអ្វីមួយដែលគេហៅថាភាពល្អឥតខ្ចោះ។
យ៉ាងណាមិញបើអ្នកបានចូលពិនិត្យនិងសិក្សាសង្កេតមើលឲ្យជ្រៅចូលក្នុងជីវិតរបស់ម្នាក់ៗ នោះអ្នកនឹងរកឃើញថានៅក្នុងគ្រប់មនុស្សម្នាក់ៗសុទ្ធតែមាននូវគុណសម្បត្តិនិងគុណវិបត្តិ។ ភាពមិនល្អឥតខ្ចោះគឺជាការពិតនៃជីវិតរបស់មនុស្ស។ វាគឺជាធាតុផ្សំដ៏សំខាន់មួយដែលអ្នកមិនអាចខ្វះបានដើម្បីសម្រេចជោគជ័យក្នុងជីវិត។ អ្វីដែលអ្នកយល់ថាផ្ទុយគ្នា តាមពិតទៅពួកវាត្រូវការគ្នាដើម្បីសម្រេចអ្វីៗបាននៅក្នុងលោកនេះ។ ភាពមិនល្អឥតខ្ចោះនេះឯងដែលធ្វើឲ្យជីវិតអ្នកពេញលេញ។ អត្ថបទថ្ងៃនេះបានដកស្រង់នូវសុភាសិតចំនួន១០របស់ចិនបុរាណដែលប្រកបដោយគតិបណ្ឌិតស៊ីជម្រៅ៖
១) «ជនដែលអាចលេបចូលសម្ដីជេរប្រទេចបានទើបជាបុរសពិតប្រាកដ។»
២) «ជនដែលក្បត់ផែនដីនឹងត្រូវបានផែនដីក្បត់វិញ។»
៣) «ចិត្តដែលតូចចង្អៀតប្រៀបបាននឹងសៀវភៅដែលបិទ គ្រាន់តែជាដុំឈើមួយដុំប៉ុណ្ណោះ។»
៤) «សុខចិត្តធ្វើជាត្បូងដែលមានចំណុចខ្វះខាតប្រសើរជាងធ្វើជាដុំថ្មមួយដុំដែលមិនមានចំណុចខ្វះខាតអ្វីសោះ។»
៥) «ជនណាដែលមិនអាចអត់ទ្រាំជាមួយនឹងភាពលំបាកបន្តិចបន្តួច គ្មានថ្ងៃអាចសម្រេចកិច្ចការធំបាននោះឡើយ។»
៦) «ការខ្វះភាពអត់ធ្មត់តែបន្តិចនឹងធ្វើឲ្យខូចកិច្ចការធំ។»
៧) «សុខចិត្តរស់នៅក្នុងខ្ទមដែលមនុស្សម្នាក់មានភាពសើចក្អាកក្អាយប្រសើរជាងរស់នៅក្នុងវិមានដែលមនុស្សម្នាក់ជូតទឹកភ្នែក។»
៨) «ជនដែលគិតហួសហេតុពេកទៅលើគ្រប់ជំហានដែលគាត់ដើរនឹងតែងតែឈរនៅតែជើងម្ខាង។»
៩) «ប្រាជ្ញាវាងវៃអាចកត់សម្គាល់បានតាមរយៈភាពសាមញ្ញបែបកូនក្មេងរបស់ខ្លួន។»
១០) «មនុស្សល្អឥតខ្ចោះមាន២ប្រភេទ ទី១គឺជាមនុស្សដែលបានស្លាប់ទៅហើយ និងទី២គឺជាមនុស្សដែលមិនទាន់កើតមក។»
ដោយ៖ ស្រីពៅ
