សុភាសិតចំនួន៨ឃ្លា ពីជុំវិញពិភពលោក ដែលបានប្រៀបដើមឈើនឹងជីវិតរបស់មនុស្ស
ជនជាតិចិនមានសុភាសិតមួយថា «មិនថាដើមឈើខ្ពស់ប៉ុណ្ណា ស្លឹករបស់វានៅតែធ្លាក់មកលើដី។» អត្ថន័យរបស់វាជាក់ស្ដែងនិងសាមញ្ញ ដែលប្រហែលជាអ្នកគ្រាន់តែអានក៏អាចយល់បានពីខ្លឹមសាររបស់វាដែរ។ មនុស្សយើងមិនថាកាលនៅរស់ខុសគ្នាយ៉ាងដូចម្ដេចក៏ដោយ ប៉ុន្តែនៅចំពោះមុខការស្លាប់ មនុស្សយើងសុទ្ធតែស្មើភាពគ្នាទាំងអស់។ នៅពេលយើងស្លាប់ទៅ យើងម្នាក់ៗនឹងត្រឡប់ទៅរកប្រភពដើមរបស់ខ្លួនឯងចូលទៅក្នុងដីរបស់ផែនដីវិញ។ អ្នកអាចនិយាយបានថាជីវិតមិនមែនជារឿងធំដុំអ្វីនោះទេ តែអ្នកក៏មិនខុសដែរនឹងគិតថាជីវិតជារឿងធំដុំ។ ទោះជាយ៉ាងណា មានរឿងខ្លះក្នុងជីវិត អ្នកមិនគួរជាប់ជំពាក់នឹងវាខ្លាំងពេកនោះទេ ព្រោះមានពេលខ្លះការពិតគឺវាមិនសំខាន់ដូចអ្វីដែលអ្នកមើលឃើញចំពោះវានោះឡើយ។ អ្វីដែលគួរប្រលែងចោល គួរតែប្រលែងចោល។
ថ្ងៃនេះយើងបានចងក្រងនូវសុភាសិតចំនួន៨ឃ្លាពីជុំវិញពិភពលោក ដែលបានប្រៀបដើមឈើនឹងជីវិតរបស់មនុស្ស៖
១) «នៅពេលកម្ដៅបានចេញផុតទៅ អ្នកភ្លេចពីម្លប់របស់ដើមឈើ។» សុភាសិតជប៉ុន
២) «ដើមឈើធំជះស្រមោលច្រើនជាងចេញផ្លែ។» សុភាសិតអាល្លឺម៉ង់
៣) «រក្សាទុកដើមឈើបៃតងនៅក្នុងបេះដូងរបស់អ្នក ពេលនោះប្រហែលជាសត្វចាបដែលច្រៀងអាចនឹងមករកអ្នក។» សុភាសិតចិន
៤) «ដើមឈើមិនមែនដុះចេញមកពីលើមេឃនោះទេ។» សុភាសិតបូស្នី
៥) «នៅពេលញ៉ាំផ្លែឈើ នឹកគិតដល់អ្នកដែលបានដាំដើមឈើនោះ។» សុភាសិតវៀតណាម
៦) «នៅពេលដើមឈើដួល ស្រមោលរបស់វារត់ហោះចេញ។» សុភាសិតចិន
៧) «មិនថាដើមឈើខ្ពស់ប៉ុណ្ណា ស្លឹករបស់វានៅតែធ្លាក់មកលើដី។» សុភាសិតចិន
៨) «ដើមឈើដែលមានប្រយោជន៍ត្រូវបានគេកាត់មុនគេ។» សុភាសិតកូរ៉េ
ដោយ៖ ស្រីពៅ
