គតិបណ្ឌិតចំនួន ៦ឃ្លា របស់ជ័ងជឺ បើអានយល់ នោះអ្នកនឹងយល់ពីអត្ថន័យពិតនៃជីវិត
ជ័ងជឺជាមួយនឹងឡៅជឺ ត្រូវបានគេស្គាល់ថាជាតួអង្គដ៏សំខាន់ជាងគេនៅក្នុងការបង្រៀនរបស់លទ្ធិតៅ។ ជ័ងជឺគឺជាទស្សនវិទូដែលមានកេរ្តិ៍ឈ្មោះល្បីល្បាញនិងទទួលបានការគោរពមួយរូបរបស់ចិន។ គាត់រស់នៅក្នុងអំឡុងសតវត្សទី៤មុនគ.ស នៅក្នុងសម័យកាល The Warring Stateរបស់ចិន។ ខាងក្រោមនេះគឺជាគតិបណ្ឌិតចំនួន៦របស់ជ័ងជឺ ដែលបើអ្នកអានយល់ នោះអ្នកនឹងយល់ពីអត្ថន័យនៃជីវិត៖
១) «បុគ្គលមានបញ្ញាដឹងថាអង្គុយនៅក្បែរច្រាំងនៃអូរក្បែរភ្នំដែលនៅដាច់ស្រយាលប្រសើរជាងធ្វើជាស្ដេចនៃពិភពលោក។»
២) «សេចក្ដីសុខគឺជាអវត្តមាននៃការស្វះស្វែងរកសេចក្ដីសុខ។»
៣) «ចូរធ្វើឲ្យបេះដូងរបស់អ្នកនៅសុខស្ងប់។ ឃ្លាំមើលភាពច្របូកច្របល់នៃសភាវៈទាំងឡាយតែសង្កេតមើលការត្រឡប់មកវិញរបស់ពួកវា។ បើអ្នកមិនដឹងពីប្រភពរបស់វាទេ អ្នកនឹងជំពប់ជើងនៅក្នុងភាពច្របូកច្របល់និងសេចក្ដីទុក្ខវេទនា។ នៅពេលអ្នកដឹងថាអ្នកមកពីណា អ្នកនឹងក្លាយជាមានការអត់ធន់ មិនចាប់អារម្មណ៍នឹងអ្វីៗ រីករាយ មានចិត្តសប្បុរសប្រៀបបាននឹងលោកយាយ មានសេចក្ដីថ្លៃថ្នូរប្រៀបបាននឹងស្ដេចដោយធម្មជាតិឯកឯង។ ចូលឲ្យជ្រៅទៅក្នុងភាពអស្ចារ្យរបស់តៅ អ្នកនឹងអាចទប់ទល់ជាមួយនឹងអ្វីៗដែលជីវិតបាននាំមកឲ្យអ្នក ហើយនៅពេលដែលសេចក្ដីស្លាប់មកដល់ អ្នកនឹងបានត្រៀមខ្លួនរួចជាស្រេច។»
៤) «ដើម្បីក្លាយជាមនុស្សល្ងង់យ៉ាងពិតប្រាកដ ចូរមានភាពស្កប់ស្កល់ជាមួយនឹងចំណេះដឹងរបស់ខ្លួនឯង។»
៥) «បើមនុស្សម្នាក់បានឆ្លងស្ទឹង ហើយទូកទទេគ្មានមនុស្សមួយបានបុកជាមួយនឹងទូករបស់គាត់ បើទោះជាគាត់ជាមនុស្សដែលឆាប់ខឹងឆេវឆាវប៉ុណ្ណា ក៏គាត់មិនខឹងខ្លាំងនោះដែរ។ តែបើសិនជាគាត់ឃើញមានមនុស្សនៅលើទូកនោះ គាត់នឹងស្រែកដាក់បុរសនោះឲ្យចែវចេញឆ្ងាយ។ បើការស្រែករបស់គាត់មិនមានអ្នកឮ គាត់នឹងស្រែកម្ដងទៀត ហើយម្ដងទៀត ហើយក៏ចាប់ផ្ដើមជេរប្រទេច ហើយគ្រប់យ៉ាងគឺមកពីមានមនុស្សនៅលើទូកនោះ។ បើអ្នកអាចធ្វើឲ្យទូករបស់អ្នកទទេឆ្លងស្ទឹងនៃជីវិត នោះគ្មាននរណាម្នាក់ដែលប្រឆាំងជំទាស់នឹងអ្នក គ្មាននរណាម្នាក់ដែលចង់ធ្វើបាបអ្នកនោះឡើយ។»
៦) «កង្កែបនៅក្នុងអណ្ដូងមិនអាចជជែកពីមហាសមុទ្របាននោះទេ ពីព្រោះតែវាត្រូវបានកម្រិតដោយទំហំនៃអណ្ដូងរបស់វា។ សត្វល្អិតក្នុងរដូវក្ដៅមិនអាចជជែកពីទឹកកកបាននោះទេ ពីព្រោះតែវាដឹងតែរដូវរបស់វាប៉ុណ្ណោះ។ បញ្ញវន្តដែលមានការគិតតូចចង្អៀតមិនអាចជជែកពីតៅបាននោះទេ ពីព្រោះតែគាត់ត្រូវបានកម្រិតដោយការបង្រៀនរបស់គាត់។ ពេលនេះអ្នកបានចេញពីច្រាំងទន្លេរបស់អ្នកនិងបានមើលឃើញមហាសមុទ្រដ៏ធំធេងហើយ។ នៅពេលនេះអ្នកដឹងពីភាពតូចទាបរបស់អ្នកហើយ ដូច្នេះពេលនេះគឺអាចទៅរួចនឹងជជែកពីគោលការណ៍ដ៏អស្ចារ្យជាមួយអ្នកបានហើយ។»
ដោយ៖ ស្រីពៅ
