ឃ្លាចំនួន ១២ ដែលបានដកស្រង់ចេញពីសៀវភៅ Tao Te Ching របស់ឡៅជឺ
ការបង្រៀនរបស់ឡៅជឺ មានលក្ខណៈខុសប្លែកយ៉ាងផ្ទុយស្រឡះពីការបង្រៀនដទៃទៀត។ ដូចជាមានឃ្លាមួយសរសេរថា «នៅពេលគ្រប់គ្នានៅក្នុងពិភពលោកឃើញភាពស្រស់ស្អាត នោះភាពមិនស្រស់ស្អាតនឹងមានវត្តមានមក។» ដូចព្រះសម្មាសម្ពុទ្ធមានដីកាថា «គ្មានអ្វីមួយដែលកើតឡើងដោយឯកឯងបាននោះទេ។ អ្វីគ្រប់យ៉ាងមានទំនាក់ទំនងជាមួយអ្វីៗផ្សេងទៀត។» ទស្សនដែលមើលឃើញថាអ្វីមួយស្អាត ដោយសារតែមានអ្វីមួយដែលអាក្រក់ជាងវាទើបយើងអាចមើលឃើញថាវាស្អាតបាន។ អ្វីៗកើតឡើងដោយសារមានការប្រៀបធៀបគ្នា។ បើអ្វីមួយឈរនៅម្នាក់ឯង នោះវាមិនមានអត្ថន័យអ្វីនោះទេ គ្មានអ្វីស្អាតនិងអ្វីមិនស្អាតនោះឡើយ។ អ្វីៗកើតឡើងចេញពីការគិតរបស់មនុស្សប៉ុណ្ណោះ។
ការបង្រៀនភាគច្រើនបង្រៀនឲ្យយើងប្រកាន់យកអំពើល្អនិងស្អប់ខ្ពើមអំពើអាក្រក់។ ប៉ុន្តែឡៅជឺ បង្រៀនយើងឲ្យដើរផ្លូវកណ្ដាល មិនឲ្យយើងប្រកាន់ខ្ជាប់យកខាងណាមួយនោះឡើយ ព្រោះអ្វីៗសុទ្ធតែកើតឡើងអាស្រ័យគ្នា ក្នុងល្អមានអាក្រក់ ក្នុងអាក្រក់មានល្អ។ បើអ្នកមិនលម្អៀងទៅទស្សនបែបណាមួយហើយដើរនៅលើផ្លូវកណ្ដាលបាន នោះអ្នកនឹងអាចមើលឃើញអ្វីៗក្នុងលោកនេះកាន់តែច្បាស់លាស់ជាងមុន មើលឃើញពីកំណើតនៃល្អនិងអាក្រក់ដែលនៅជាមួយគ្នានៅក្នុងរឿងរ៉ាវនីមួយៗ។ ហេតុនេះហើយទើបបានជាអ្នកមិនត្រូវជាប់ជំពាក់នឹងអំពើល្អដែលខ្លួនឯងបានធ្វើនោះឡើយ ពុំនោះទេវានឹងបង្កកំណើតទៅជាសេចក្ដីអាក្រក់នៅក្នុងចិត្តអ្នកមិនខាន។
ថ្ងៃនេះយើងបានដកស្រង់នូវឃ្លាចំនួន១២ដែលបានដកស្រង់ចេញពីសៀវភៅ Tao Te Ching របស់ឡៅជឺ៖
១) «ពិភពលោកប្រៀបបាននឹងថូផ្កាដ៏ពិសិដ្ឋមួយដែលមិនអាចផ្លាស់ប្ដូរបាន។ បុគ្គលណាដែលផ្លាស់ប្ដូរវា នឹងបំផ្លាញវា។ បុគ្គលណាដែលចាប់វា នឹងបាត់បង់វា។»
២) «នៅពេលគ្រប់គ្នានៅក្នុងពិភពលោកឃើញភាពស្រស់ស្អាត នោះភាពមិនស្រស់ស្អាតនឹងមានវត្តមានមក។»
៣) «ដំបូងនិងចុងក្រោយដេញតាមគ្នា។»
៤) «សេចក្ដីសោកសៅគឺជាអ្វីដែលសេចក្ដីសុខផ្អែកលើ សេចក្ដីសុខគឺជាអ្វីដែលសេចក្ដីសោកសៅចាំលាក់បង្កប់នៅពីក្រោម។»
៥) «ស្មូនដីឥដ្ឋឲ្យទៅជាចាន។ លំហទទេធ្វើឲ្យវាក្លាយជារបស់មានប្រយោជន៍។»
៦) «តម្លៃបានមកពីអ្វីដែលមាននៅទីនោះ តែប្រយោជន៍បានមកពីអ្វីដែលមិននៅទីនោះ។»
៧) «មានសេរីភាពពីការចង់បាន អ្នកនឹងឃើញនូវអាថ៌កំបាំង។ ពោរពេញដោយការចង់បាន អ្នកនឹងឃើញនូវការបង្ហាញឡើង។»
៨) «កុំឲ្យតម្លៃទៅលើទ្រព្យការពារពីចោរប្លន់។»
៩) «បង្ហាញអួតអាងពីភាពមានបាននិងមុខតំណែងជាមួយនឹងភាពក្រអឺតក្រទម នាំមកនូវការធ្លាក់ខ្លួនរបស់បុគ្គលនោះ។»
១០) «គ្មានសេចក្ដីអភ័ព្វណាដែលធំធេងជាងសេចក្ដីលោភលន់នោះឡើយ។»
១១) «គ្មានអ្វីមួយនៅក្នុងលោកដែលទន់ជាងនិងខ្សោយជាងទឹកនោះឡើយ។ ប៉ុន្តែ ដើម្បីប្រយុទ្ធជាមួយអ្វីដែលរឹងនិងខ្លាំងក្លា គ្មានអ្វីដែលអាចខ្លាំងជាងវានោះឡើយ។»
១២) «ស្ដែងទង្វើដែលសាមញ្ញនិងប្រកាន់ខ្ជាប់នូវភាពបរិសុទ្ធ។»
ដោយ៖ ស្រីពៅ
