បច្ចេកវិទ្យា​ថ្មី! គម្រោង​​ប្រព័ន្ធ​សូឡា​បូម​ទឹក​ក្រោម​ជួយវិស័យកសិកម្មកំពុង​ស្ថិត​ក្នុង​ការ​សិក្សា​



ក្រុមហ៊ុន​ Gansu Academy for Water Conservancy (GAWC) របស់​ប្រទេស​ចិន បាន​សហការ​ជា​មួយ​ក្រសួង​កសិកម្ម រុក្ខា​ប្រមាញ់ និង​នេសាទ លើ​គម្រោង​បច្ចេកទេស និង​ការ​សិក្សា​ស្រាវជ្រាវ​រួមគ្នា​លើ​ការ​គ្រប់គ្រង​និង​ការ​អភិវឌ្ឍ​ធនធាន​ទឹក​នៅ​កម្ពុជា ព្រម​ទាំង​ការ​ធ្វើ​ឲ្យ​ប្រសើរ​ឡើង​នូវ​ការ​គ្រប់គ្រង​ និង​ប្រើប្រាស់​ទឹក​ក្រោម​ដី​សម្រាប់​វិស័យ​កសិកម្ម​។ ក្នុង​នោះ​ក្រុមហ៊ុន​បាន​ជ្រើសរើស​ទីតាំង​អនុវត្ត​គម្រោង​សាក​ល្បង​ស្តី​ពី​ការ​រៀបចំ​ប្រព័ន្ធ​ថាមពល​សូឡា​បូម​ទឹក​ក្រោម​ដី​សម្រាប់​ស្រោចស្រព នៅ​ក្នុង ខេត្ត​ត្បូងឃ្មុំ និង​ខេត្ត​ព្រៃវែង។

ឯកឧត្តម វេង សាខុន រដ្ឋមន្ត្រី​ក្រសួង​កសិកម្ម រុក្ខា​ប្រមាញ់ និង​នេសាទ នៅ​ក្នុង​ជំនួប​ជា​មួយ​លោក  Chengxiang MA នាយក​រង​នៃ​ក្រុមហ៊ុន Gansu Academy for Water Conservancy (GAWC) និង​សហការី​មក​ពី​ខេត្ត Gansu ប្រទេស​ចិន កាល​ពី​ពេល​កន្លង​ទៅ បាន​កោត​សរសើរ​ចំពោះ​កិច្ច​ខិតខំ​ប្រឹងប្រែង​របស់​ក្រុមហ៊ុន និង​ការ​ប្រើប្រាស់​ប្រព័ន្ធ​សូឡា​សម្រាប់​បូម​ទឹក​ក្រោម​ដី​មក​ប្រើប្រាស់​ដែល​ជា​បច្ចេកវិទ្យា​ថ្មី​មួយ​សម្រាប់​កម្ពុជា ដោយ​អាច​កាត់​បន្ថយ​ការ​ចំណាយ​ថាមពល​អគ្គិសនី កម្លាំង​ពលកម្ម​ ក្នុង​ការ​ពង្រីក​ការអភិវឌ្ឍ​វិស័យ​កសិកម្ម ឲ្យ​មាន​និរន្តរភាព​យូរអង្វែង។  

ជា​ការ​ឆ្លើយ​តប លោក Chengxiang MA បាន​ជម្រាប​ជូន​ថា​ ក្រុមហ៊ុន​បាន​កំពុង​តែ​កៀរគរ​រក​ជំនួយ​ពី​គ្រប់​ដៃ​គូ​វិនិយោគ​នៅ​ប្រទេស​ចិន​សម្រាប់​កិច្ច​សហប្រតិបត្តិការ​ក្នុង​វិស័យ​កសិកម្ម និង​តាម​រយៈ​គម្រោង​អភិវឌ្ឍ​ផ្សេងៗ​ទៀត​ក្នុង​វិស័យ​នេះ ។ ក្រៅ​ពី​នេះ លោក​បាន​ជម្រាប​ជូន​ថា​ នឹង​ធ្វើ​ការ​សហការ​គ្នា​ជា​មួយ​សាកលវិទ្យាល័យ​ជា​ច្រើន​ក្នុង​ការ​សន្យា​ផ្តល់​នូវ​អាហារូបករណ៍​ជូន​ដល់​និស្សិត​កម្ពុជា​ឲ្យ​បាន​កាន់​តែ​ច្រើន​លើ​ផ្នែក វិទ្យាសាស្រ្ត​កសិកម្ម និង​បច្ចេកវិទ្យា។ 

ជា​មួយ​គ្នា​នេះ​ឯកឧត្ដម​រដ្ឋមន្ត្រី​បាន​បញ្ជាក់​ពី​គោល​ជំហរ​របស់​ក្រសួង​ក្នុង​ការ​គាំទ្រ​ឲ្យ​មាន​ការ​ចុះ​ហត្ថលេខា​លើ​អនុស្សារណៈ​ដើម្បី​ជា​មូលដ្ឋាន​សម្រាប់​ដំណើរ​ការ​នៃ​ការ​នាំ​ចូល​សម្ភារ​កសិកម្ម ពី​ប្រទេស​ចិន​សម្រាប់​ការ​អនុវត្ត​គម្រោង​សាកល្បង​នៅ​ខេត្ត​ទាំង​ពីរ និង​ឈាន​ទៅ​រក​ការ​អនុវត្ត​គម្រោង​ក្នុង​ខេត្ត​គោលដៅ​មួយ​ចំនួន​ទៀត​ដូច​ជា​ ខេត្ត​តាកែវ កំពង់ចាម និង​ស្វាយ​រៀង​ជា​ដើម៕

ដោយ៖ ជួប ស្រីរ័ត្ន

X
5s