សម្រង់គតិចំនួន ១០ឃ្លា ដែលអាចធ្វើជាមេរៀនជីវិតដ៏មានតម្លៃរបស់អ្នកបាន
Rita Mae Brown កវីនិពន្ធនិងសកម្មជនមួយរូបរបស់អាមេរិកបាននិយាយថា «គន្លឹះមួយដែលឆ្ពោះទៅកាន់សេចក្ដីសុខគឺជាការចងចាំមិនល្អ។» ពិតណាស់អ្វីក៏ដោយតែងមានផលល្អនិងផលអាក្រក់របស់វា។ ទោះជាយ៉ាងណា បើទោះជានិយាយចំពោះការប្រើប្រាស់ខួរក្បាលសម្រាប់ចងចាំព័ត៌មានដែលចាំបាច់សម្រាប់ការងារឬការសិក្សា ការចងចាំមិនល្អអាចនឹងនាំមកនូវការលំបាកជាច្រើនដល់អ្នកក៏ពិតមែន យ៉ាងណាមិញ បើនិយាយចំពោះទំនាក់ទំនងរវាងអ្នកជាមួយមនុស្សនៅក្នុងសង្គម នោះការចងចាំមិនល្អអាចក្លាយជាឫសគល់មួយនៃសេចក្ដីសុខរបស់អ្នកបាន។ នៅពេលអ្នកមានការចងចាំមិនសូវល្អ អ្នកមិនសូវយករឿងអ្វីៗមកដាក់ក្នុងចិត្ត មិនសូវខ្វាយខ្វល់ពីរឿងខាតចំណេញជាមួយនរណាម្នាក់ នោះចិត្តអ្នកនឹងស្រាល ត្រជាក់ និងមានសន្តិភាព ដែលវានឹងនាំមកនូវក្ដីសុខដល់អ្នកក្នុងជីវិត។
ខាងក្រោមនេះគឺជាគតិចំនួន១០ឃ្លា ដែលអាចធ្វើជាមេរៀនជីវិតដ៏មានតម្លៃរបស់អ្នកបាន៖
១) «មានពេលខ្លះសត្រូវរបស់យើងគឺជាគ្រូដ៏ល្អបំផុតរបស់យើង មនុស្សអាចរៀនសូត្រពីកំហុសរបស់ខ្លួនឯង។ ការបែកបាក់មានពេលខ្លះមានន័យថាជាការចាប់កំណើតឡើងវិញ។» Keanu Reeves
២) «គន្លឹះមួយដែលឆ្ពោះទៅកាន់សេចក្ដីសុខគឺជាការចងចាំមិនល្អ។» Rita Mae Brown
៣) «មនុស្សដែលមានអណ្ដាតមុតស្រួច ចុងក្រោយនឹងកាត់ខ្លួនឯង។» J. Robson Koenig
៤) «មានពេលខ្លះរឿងដ៏សាមញ្ញគឺជារឿងដែលពិបាកបំផុតក្នុងការសម្រេចបាន។» Keanu Reeves
៥) «បើអ្នកនិយាយការពិត អ្នកមិនចាំបាច់ចងចាំអ្វីទាំងអស់។» Mark Twain
៦) «ចូរប្រាប់ទៅកាន់បេះដូងរបស់អ្នកថាភាពភ័យខ្លាចសេចក្ដីទុក្ខ វេទនាជាងសេចក្ដីទុក្ខខ្លួនវាទៅទៀត។» Paulo Coelho
៧) «ខ្ញុំគិត៩៩ដងហើយនៅតែមិនអាចគិតឃើញអ្វីសោះ។ ខ្ញុំឈប់គិតហើយក៏ទៅហែលទឹកយ៉ាងស្ងប់ស្ងាត់ ពេលនោះការពិតក៏រត់មករកខ្ញុំ។» អាល់ប៊ឺត អាញស្តាញ
៨) «ការលំបាកទាំងឡាយនៅក្នុងជីវិតបានសូនអ្នកឲ្យក្លាយទៅជាមនុស្សដូចដែលអ្នកនៅថ្ងៃនេះ។ ចូរមានការអំណរគុណដល់ពេលវេលាលំបាក ពួកវានេះហើយដែលអាចធ្វើឲ្យអ្នករឹងមាំជាងមុន។» Keanu Reeves
៩) «ការពិតមិនត្រូវបានដឹងដោយចំណេះដឹងនោះឡើយ។ វាត្រូវបានរកឃើញដោយភាពស្ងប់ស្ងាត់ ហើយចំណេះដឹងគឺពិតជាគួរឲ្យរំខានណាស់។» Rajneesh
១០) «ភាពស្ងប់ស្ងាត់និងការនៅម្នាក់ឯងគឺជាការប្រឈមមុខដាក់គ្នា។ ពួកវាជ្រមុជយើងយ៉ាងរហ័សទៅក្នុងការពិត។» Babara De Angelis
ដោយ៖ ស្រីពៅ
