សម្ដី ៩ឃ្លា ពីអ្នកគណិតសាស្ត្រ Pascal សម្រាប់ស្វែងយល់ពីការគិតរបស់បុគ្គលដ៏អស្ចារ្យរូបនេះ
លោក Blaise Pascal គឺជាអ្នកគណិតសាស្ត្រ រូបវិទូ អ្នកច្នៃបង្កើត អ្នកនិពន្ធ និងជាទេវវិទូកាតូលិកមួយរូបរបស់បារាំង។ លោកបានរស់នៅក្នុងអំឡុងឆ្នាំ១៦២៣ដល់ឆ្នាំ១៦៦២ ដែលមានឪពុកជាអ្នកប្រមូលពន្ធ។ លោកបានរួមចំណែកកសាងសមិទ្ធផលជាច្រើននៅក្នុងវិស័យគណិតវិទ្យានិងរូបវិទ្យា ដែលមួយនៅក្នុងចំណោមសមិទ្ធផលរបស់គាត់ជាច្រើន គឺនៅក្នុងវ័យទើបតែ១៩ឆ្នាំ រូបលោកបានចាប់ផ្ដើមផ្ដួចផ្ដើមបង្កើតម៉ាស៊ីនគិតលេខ។ ៣ឆ្នាំក្រោយមក ជាមួយនឹងគំរូចំនួន៥០ លោកបង្កើតបានម៉ាស៊ីនចំនួន២០ ដែលបានធ្វើឲ្យគាត់ក្លាយជាមនុស្សម្នាក់នៅក្នុងចំណោម២នាក់ជាអ្នកបង្កើតម៉ាស៊ីនគិតលេខដំបូងបំផុត។ ពេញមួយជីវិត លោកមានសុខភាពទន់ខ្សោយ ជាពិសេសចាប់ពីអាយុ១៨ឆ្នាំ ហើយគាត់ក៏បានស្លាប់រយៈពេល២ខែក្រោយពីខួបកំណើតទី៣៩។
ថ្ងៃនេះយើងបានដកស្រង់នូវសម្ដីរបស់លោក Pascal ចំនួន ៩ឃ្លា ដើម្បីឲ្យអ្នកបានស្វែងយល់ពីការគិតរបស់បុគ្គលដ៏អស្ចារ្យរូបនេះ៖
១) «វាមិនមែនជារឿងល្អនោះទេក្នុងការមានសេរីភាពខ្លាំងពេក។ វាមិនមែនជារឿងល្អនោះទេក្នុងការមានគ្រប់យ៉ាងដែលអ្នកចង់បាន។»
២) «បើយើងត្រួតពិនិត្យការគិតរបស់យើង យើងនឹងរកឃើញថាពួកវាតែងតែរវល់ជាមួយអតីតកាលនិងអនាគតកាលជានិច្ច។»
៣) «យើងរកឃើញនូវការពិត មិនមែនត្រឹមតែតាមរយៈហេតុផលតែម្យ៉ាងនោះទេ តែក៏តាមរយៈបេះដូងផងដែរ។»
៤) «ការពិតពិតជាស្រពិចស្រពិលណាស់ក្នុងពេលឥឡូវនេះ រីឯភាពក្លែងក្លាយវិញបែរជារឹងមាំណាស់ រហូតទាល់តែបុគ្គលម្នាក់ស្រឡាញ់ការពិត ពុំនោះទេគាត់មិនអាចដឹងវាបានឡើយ។»
៥) «ការប្រឆាំងជំទាស់មិនមែនជាសញ្ញាដែលចង្អុលបង្ហាញពីកំហុសឆ្គងនោះទេ ឬក៏មិនមែនការប្រឆាំងជំទាស់ជាសញ្ញាចង្អុលបង្ហាញពីការពិតនោះដែរ។»
៦) «ភាពអស្ចារ្យរបស់មនុស្សស្ថិតនៅក្នុងអំណាចនៃការគិតរបស់របស់ខ្លួន។»
៧) «បេះដូងមានហេតុផលរបស់វា គឺហេតុផលមិនដឹងអ្វីទាំងអស់។»
៨) «មនុស្សច្រើនតែជឿជាក់ទៅលើហេតុផលដែលពួកគេរកឃើញដោយខ្លួនឯងជាជាងហេតុផលដែលត្រូវបានរកឃើញដោយអ្នកដទៃ។»
៩) «ពាក្យដែលត្រូវបានរៀបខុសលំដាប់លំដោយ មានអត្ថន័យខុសគ្នា។ ឯអត្ថន័យដែលត្រូវបានរៀបខុសលំដាប់លំដោយ នឹងមានឥទ្ធិពលខុសគ្នា។»
ដោយ៖ ស្រីពៅ
