Carl Jung គ្រូពេទ្យ​ចិត្តសាស្ត្រ​ដ៏​ល្បី​មួយ​រូប​របស់​ស្វីស​បាន​និយាយ​ថា «នាំ​មនុស្ស​ប្រក្រតី​មក​ឲ្យ​ខ្ញុំ ហើយ​ខ្ញុំ​នឹង​ព្យាបាល​បុគ្គលម្នាក់នោះឲ្យ​អ្នក។» អត្ថន័យ​ដែល​គាត់​បាន​បង្កប់​នៅ​ក្នុង​ឃ្លា​នេះ​គឺ​ចង់​ចង្អុល​បង្ហាញ​ថា នៅ​ក្នុង​គ្រប់​មនុស្ស​ម្នាក់ៗ​ដែល​គិត​ថា​ខ្លួនឯង​ប្រក្រតី​ទាំងនោះ គឺ​សុទ្ធតែ​មាន​មនុស្ស​ដែល​មិន​ប្រក្រតី​នៅ​បង្កប់​ខាងក្នុង​មនុស្ស​ដែល​ប្រក្រតី​នេះ​ដែរ។ មនុស្ស​ណា​ក៏​ដោយ លើកលែង​តែ​បុគ្គល​ដែល​បាន​មើល​ធ្លុះ​ពី​សច្ចធម៌​នៃ​ជីវិត​និង​បាន​ត្រាស់​ដឹង​ជា​ព្រះ​សម្មាសម្ពុទ្ធ ពុំ​នោះ​ទេ​ក្រៅ​ពី​នេះ​សុទ្ធតែ​ជា​មនុស្ស​ដែល​មិន​ប្រក្រតី​ទាំងអស់។

មនុស្ស​យើង​តែងតែ​ធ្លាប់​គិត​ថា​ទាល់តែ​មនុស្ស​ដែល​បាត់បង់​សតិ​ខ្លាំង នោះ​ទើប​ហៅថា​មនុស្ស​មិន​ប្រក្រតី ឬ​មនុស្ស​ឆ្កួត។ តែ​តាម​ការ​ពិត​ទៅ នៅ​ខាងក្នុង​ខ្លួន​យើង​ម្នាក់ៗ​ក៏​មាន​បង្កប់​នូវ​មនុស្ស​ដែល​មិន​ប្រក្រតី​នៅ​បង្កប់​យ៉ាង​ជ្រៅ​ក្នុង​ខ្លួន​យើង​ដែរ។ ដូច​ទៅ​នឹង​អ្វីៗ​ដែល​ចាំង​ចំ​ពន្លឺ​ថ្ងៃ​ជះ​នូវ​ស្រមោល​ដូច្នោះ មនុស្ស​យើង​មាន​ពន្លឺ​និង​ភាព​ងងឹត មាន​សេចក្ដី​ល្អ​និង​សេចក្ដី​អាក្រក់ មាន​ព្រះចន្ទ​និង​ព្រះអាទិត្យ​រួម​ជាមួយ​គ្នា ទើប​បង្កើត​ជា​មនុស្ស​ពេញលេញ។ មនុស្ស​យើង​មិន​ថា​មើល​ទៅ​ហាក់​ដូចជា​សតិ​មាន​លំនឹង​ប៉ុណ្ណា វៃ​ឆ្លាត​ចេះ​ដឹង​ប៉ុណ្ណា ក៏​នៅ​តែ​មាន​បញ្ហា​ផ្លូវចិត្ត​ដែល​នៅ​បង្កប់​ជ្រៅ​នៅ​ក្នុង​ចិត្ត​វិញ្ញាណ​របស់​ពួកគេ​ដែរ។ ដូច្នេះ​ហើយ​ទើប​បាន​ជា​លោក Carl Jung និយាយ​ថា នាំ​មនុស្ស​ប្រក្រតី​ឲ្យ​គាត់ ហើយ​គាត់​នឹង​ព្យាបាល​មនុស្ស​នោះ​ឲ្យ​អ្នក​មើល។

ខាងក្រោម​នេះ​គឺជា​ទស្សន​ចំនួន​១០​ឃ្លា​ពី​បុគ្គល​ដែល​មាន​គតិ​ខ្ពង់ខ្ពស់ ដែល​អ្នក​គួរ​អាន៖

១) «កុំ​រង់ចាំ​អ្នកដឹកនាំ។ ចូរ​ធ្វើ​វា​តែ​ឯង ពី​ម្នាក់​ទៅ​ម្នាក់។» Mother Teresa

២) «កុំ​មាន​អារម្មណ៍​ថា​ឯកា ចក្រវាល​ទាំងមូល​ស្ថិត​នៅ​ក្នុង​ខ្លួន​អ្នក។» Rumi

៣) «ខ្ញុំ​នៅ​ជិត​ពេក​រហូត​ធ្វើឲ្យ​ខ្ញុំ​មើល​ទៅ​ហាក់​ដូចជា​នៅ​ឆ្ងាយ។ លាយ​បញ្ចូល​ជាមួយ​អ្នក​ទាំងស្រុង​ពេក​រហូត​ធ្វើឲ្យ​ខ្ញុំ​ហាក់​ដូចជា​នៅ​ដាច់​ដោយ​ឡែក​ពី​អ្នក។ នៅ​កណ្ដាល​វាល​ពេក​រហូត​ធ្វើឲ្យ​ខ្ញុំ​ហាក់​ដូចជា​បំបាំង​ខ្លួន។ ស្ងប់ស្ងាត់​ពេក ពី​ព្រោះ​តែ​ខ្ញុំ​កំពុងតែ​និយាយ​ជាមួយ​អ្នក​ឥត​ឈប់ឈរ។» Rumi

៤) «ភាព​ស្ងប់ស្ងាត់​គឺជា​ភាសា​របស់​ព្រះ ក្រៅ​ពី​នោះ​សុទ្ធតែ​ជា​ការ​បកប្រែ​មិន​បាន​ល្អ។» Rumi

៥) «សេចក្ដី​ទុក្ខវេទនា​គឺជា​គ្រូ​ដ៏​អស្ចារ្យ​មួយ។» Ryan Hall

៦) «នៅ​ក្នុង​ភាព​ច្របូកច្របល់​គឺជា​ចក្រវាល នៅ​ក្នុង​ភាព​ចលាចល​ទាំងអស់​គឺជា​ភាព​មាន​របៀប​យ៉ាង​សម្ងាត់​មួយ។» Carl Jung

៧) «នាំ​មនុស្ស​ប្រក្រតី​មក​ឲ្យ​ខ្ញុំ ហើយ​ខ្ញុំ​នឹង​ព្យាបាល​បុគ្គលម្នាក់នោះ​ឲ្យ​អ្នក។» Carl Jung

៨) «តើ​មាន​នរណា​ដែល​បាន​យល់ដឹង​យ៉ាង​ពេញលេញ​ថា​ប្រវត្តិសាស្ត្រ​មិនមែន​មាន​នៅ​ក្នុង​សៀវភៅ​ដែល​ក្រាស់​នោះ​ទេ​ប៉ុន្តែ​គឺ​ស្ថិត​នៅ​ក្នុង​ឈាម​របស់​យើង ?» Carl Jung

៩) «ខ្ញុំ​អាច​ទ្រាំទ្រ​ជាមួយ​ការ​ឈឺចាប់​ណា​បាន​ទាំងអស់​ឲ្យតែ​វា​មាន​អត្ថន័យ។» Haruki Murakam

១០) «ការ​ឈឺចាប់​បង់​ថ្លៃ​ចំណាយ​ទៅលើ​ចំណូល​នៃ​របស់​ដែល​មាន​តម្លៃ​នីមួយៗ។» William Shakespeare

ដោយ៖ ស្រីពៅ