សម្ដីដកស្រង់ចំនួន ៨ឃ្លា ពីអ្នកវិភាគចិត្តសាស្ត្រជ្វីសអាល្លឺម៉ង់ លោក Erich Fromm
លោក Erich Fromm គឺជាជនជាតិជ្វីសអាល្លឺម៉ង់មួយរូបដែលបានរត់គេចពីរបបផ្ដាច់ការណាស៊ី និងប្ដូរទៅតាំងលំនៅនៅឯសហរដ្ឋអាមេរិកវិញ។ លោក គឺជាអ្នកចិត្តសាស្ត្រផ្នែកសង្គម អ្នកវិភាគចិត្តសាស្ត្រ សង្គមវិទូ ទស្សនវិទូផ្នែកមនុស្សជាតិ ព្រមទាំងជាអ្នកសង្គមនិយមផ្នែកប្រជាធិបតេយ្យមួយរូប ដែលបានរស់នៅក្នុងអំឡុងឆ្នាំ១៩០០ដល់១៩៨០។ លើសពីនេះ លោក Erich Fromm ក៏ស្ថិតនៅក្នុងចំណោមជាស្ថាបនិកមួយរូបនៃស្ថាប័ន The William Alanson White Institute សម្រាប់ហ្វឹកហាត់អ្នកវិភាគចិត្តសាស្ត្រ និងអ្នកព្យាបាលជំងឺផ្លូវចិត្ត នៅឯទីក្រុងញូវយ៉ក សហរដ្ឋអាមេរិក។ ថ្ងៃនេះយើងបានចងក្រងនូវសម្ដីដកស្រង់របស់គាត់ចំនួន៨ឃ្លា ដែលអ្នកគួរសិក្សាពីអ្នកចិត្តសាស្ត្ររូបនេះ៖
- «គ្រោះថ្នាក់នៃអតីតកាលគឺនៅត្រង់ថាមនុស្សបានក្លាយជាទាសករ។ គ្រោះថ្នាក់នៃអនាគតគឺនៅត្រង់ថាមនុស្សអាចនឹងក្លាយជាមនុស្សយន្ត។»
- «មនុស្សរាប់លាននាក់មានជំងឺផ្លូវចិត្តក្នុងទម្រង់តែមួយ មិនបានធ្វើឲ្យមនុស្សទាំងនេះធម្មតានោះឡើយ។»
- «ការស្រេកឃ្លាននូវភាពទៀងទាត់បានរាំងស្ទះដល់ការស្វែងរកនូវអត្ថន័យ។ ភាពមិនទៀងទាត់គឺជាលក្ខខណ្ឌដ៏ជាក់លាក់មួយក្នុងការជំរុញមនុស្សឲ្យពន្លាអំណាចរបស់ពួកគេចេញមក។»
- «បើខ្ញុំជាអ្វីដែលខ្ញុំមាន ចុះបើសិនជាខ្ញុំបាត់បង់នូវអ្វីដែលខ្ញុំមានដូច្នេះតើខ្ញុំគឺជានរណា?»
- «ប៉ូលផ្ទុយគ្នារវាងគោលការណ៍ធាតុប្រុសនិងធាតុស្រីក៏មានដូចគ្នានៅក្នុងធម្មជាតិដែរ មិនត្រឹមតែដូចមានយ៉ាងជាក់ស្ដែងនៅក្នុងសត្វនិងរុក្ខជាតិប៉ុណ្ណោះទេ ប៉ុន្តែក៏មាននៅក្នុងប៉ូលផ្ទុយគ្នារវាងដំណើរការដ៏មូលដ្ឋាន២ ដែលជាការទទួលយកនិងការស្រូបយកផងដែរ។ វាគឺជាប៉ូលផ្ទុយគ្នារវាងផែនដីនិងភ្លៀង រវាងស្ទឹងនិងមហាសមុទ្រ រវាងយប់និងថ្ងៃ រវាងងងឹតនិងពន្លឺ រវាងរូបីនិងអរូបី។»
- «ស្របពេលពួកយើងឡើងកាំជណ្ដើរនៃសង្គម ភាពសាហាវឃោរឃៅពាក់មុខកាន់តែក្រាស់។»
- «វាមិនអាចមានសេរីភាពពិតប្រាកដដោយមិនមានសេរីភាពក្នុងភាពបរាជ័យបានឡើយ។»
- «ភារកិច្ចដែលយើងត្រូវដាក់ឲ្យខ្លួនឯងមិនមែនជាការមានអារម្មណ៍មានសុវត្ថិភាពឡើយ តែគឺជាការដែលអាចអត់ធន់នឹងការដែលមិនមានសុវត្ថិភាពបាន។»
អត្ថបទទាក់ទង៖ ទស្សនចំនួន១០ឃ្លាពីលោក Montaigne ទស្សនវិទូបារាំងសម័យកាល French Renaissance
ដោយ៖ ស្រីពៅ
