សម្ដីដ៏ស៊ីជម្រៅចំនួន ៥ឃ្លា របស់ Nisargadatta Maharaj ជាគ្រូបង្រៀនចិត្តវិញ្ញាណមួយរូបរបស់ហិណ្ឌូ
ថ្ងៃនេះយើងបានចងក្រងនូវសម្ដីដ៏ស៊ីជម្រៅចំនួន ៥ឃ្លា របស់ Nisargadatta Maharaj ជាគ្រូបង្រៀនចិត្តវិញ្ញាណមួយរូបរបស់ហិណ្ឌូ:
១) «អ្នកនឹងទទួលបានគ្រប់យ៉ាងដែលអ្នកត្រូវការនៅពេលអ្នកឈប់សួររកអ្វីដែលអ្នកមិនត្រូវការ។»
២) «សេចក្ដីសុខពិតប្រាកដគឺមិនមានហេតុបណ្ដាលវា ហើយវាក៏មិនអាចបាត់បង់បានដោយសារតែខ្វះការរំញោចនោះដែរ។ វាមិនមែនផ្ទុយពីភាពសោកសៅនោះឡើយ វារួមបញ្ចូលនូវរាល់ភាពសោកសៅនិងសេចក្ដីទុក្ខ។»
៣) «ការរំពឹងទុករបស់អ្នកទៅលើអ្វីមួយដែលប្លែកពីគេនិងគួរឲ្យចាប់អារម្មណ៍ រំពឹងទុកទៅលើការផ្ទុះឡើងដែលអស្ចារ្យ គឺគ្រាន់តែរាំងស្ទះនិងពន្យារពេលការស្គាល់ខ្លួនឯងរបស់អ្នកប៉ុណ្ណោះ។ អ្នកមិនត្រូវរំពឹងទុកការផ្ទុះឡើងនោះឡើយ ក៏ព្រោះតែការផ្ទុះឡើងត្រូវបានកើតឡើងរួចមកហើយក្នុងខណៈពេលដែលអ្នកបានចាប់កំណើត នៅពេលអ្នកស្គាល់ខ្លួនឯងថាជាអត្ថិភាព ដឹង និងអារម្មណ៍។ មានកំហុសតែមួយគត់ដែលអ្នកបានសាងគឺអ្នកយកខាងក្នុងជាខាងក្រៅ ឯខាងក្រៅជាខាងក្នុង។ អ្វីដែលនៅក្នុងអ្នក អ្នកយកជានៅខាងក្រៅអ្នក ហើយអ្វីដែលនៅខាងក្រៅ អ្នកយកជានៅខាងក្នុង។ ការគិតនិងអារម្មណ៍នៅខាងក្រៅ ប៉ុន្តែអ្នកបែរជាយកវាមកស្និទ្ធនឹងអ្នក។ អ្នកជឿថាពិភពលោកខាងក្រៅគឺជាអ្វីដែលពិតមិនលម្អៀង ខណៈពេលដែលវាគឺជាចំណាំងផ្លាតនៃចិត្តរបស់អ្នកទាំងស្រុង។ នេះគឺជាការយល់ច្រឡំដ៏មូលដ្ឋានមួយ ហើយក៏មិនមានការផ្ទុះឡើងណាដែលនឹងអាចកែប្រែវាឲ្យត្រូវបានដែរ។ អ្នកត្រូវតែគិតចេញពីវាដោយខ្លួនឯង។ មិនមានផ្លូវផ្សេងនោះឡើយ។»
៤) «ការយកចិត្តទុកដាក់របស់អ្នកចំពោះអ្នកដទៃគឺអាត្មានិយម គិតតែពីប្រយោជន៍ខ្លួនឯង និងផ្ដោតតែទៅលើខ្លួនឯង។ អ្នកមិនបានចាប់អារម្មណ៍ទៅលើអ្នកដទៃជាបុគ្គលនោះឡើយ ប៉ុន្តែគ្រាន់តែក៏ដោយសារតែពួកគេអាចបន្ថែមឬបង្កើនរូបភាពរបស់អ្នកអំពីខ្លួនឯងប៉ុណ្ណោះ។ ចុងបញ្ចប់នៃភាពអាត្មានិយមគឺគ្រាន់តែជាការខ្វាយខ្វល់តែទៅលើការការពារ ការថែរក្សា និងការបង្កើនរាងកាយរបស់បុគ្គលម្នាក់ប៉ុណ្ណោះ។ រាងកាយគឺខ្ញុំសំដៅលើគ្រប់យ៉ាងដែលជាប់ពាក់ព័ន្ធនឹងឈ្មោះរបស់អ្នកនិងរូបរាងរបស់អ្នក គ្រួសាររបស់អ្នក កុលសម្ព័ន្ធ ប្រទេសជាតិ និងពូជសាសន៍ជាដើម។ ជាប់ជំពាក់ទៅនឹងឈ្មោះនិងរូបរាងរបស់ខ្លួនគឺជាភាពអាត្មានិយម។ បុគ្គលណាដែលដឹងថាគាត់មិនមែនជារាងកាយហើយក៏មិនមែនជាការគិត មិនអាចអាត្មានិយមបានឡើយ ក៏ព្រោះតែគាត់មិនមានអ្វីសម្រាប់អាត្មានិយមដើម្បីវានោះឡើយ។»
៥) «អ្នកបានចំណាយថាមពលដ៏ច្រើនក្នុងការសាងសង់គុកសម្រាប់ខ្លួនឯង។ ពេលនេះចូរចំណាយថាមពលច្រើនដដែលទៅលើការកម្ទេចវាចោល។ តាមពិត ការកម្ទេចចោលគឺងាយស្រួលនោះទេ ក៏ព្រោះតែភាពក្លែងក្លាយនឹងរលាយបាត់ទៅនៅពេលវាត្រូវបានរកឃើញ។»
ដោយ៖ ស្រីពៅ
អត្ថបទទាក់ទង៖ សម្ដីចំនួន១០ឃ្លារបស់កវីនិពន្ធរឿងកំប្លែងបែបសើចចំអករបស់អង់គ្លេស លោក Terence Pratchett
