ប្រយោគចំនួន ៦ឃ្លា ដែលបានដកស្រង់ចេញពីសៀវភៅ In Case Nobody Told You ដោយកវីនិពន្ធ Emily Maroutian
ខាងក្រោមនេះគឺជាប្រយោគចំនួន ៦ឃ្លា ដែលបានដកស្រង់ចេញពីសៀវភៅ In Case Nobody Told You ដោយកវីនិពន្ធ Emily Maroutian:
១) «ថាមពលគឺជារូបិយប័ណ្ណនៃចក្រវាល។ នៅពេលអ្នកផ្ដោតអារម្មណ៍ទៅលើអ្វីមួយ អ្នកនឹងទិញបទពិសោធន៍មួយនោះ។ ដូច្នេះហើយនៅពេលអ្នកអនុញ្ញាតឲ្យសតិដឹងរបស់អ្នកផ្ដោតទៅលើនរណាម្នាក់ឬអ្វីមួយដែលធ្វើឲ្យអ្នកម៉ួម៉ៅ អ្នកនឹងចិញ្ចឹមវាជាមួយនឹងថាមពលរបស់អ្នក ហើយវានឹងតបស្នងមកវិញនូវបទពិសោធន៍នៃការដែលមានអារម្មណ៍ម៉ួម៉ៅ។ ចូរមានការប្រុងប្រយ័ត្នក្នុងការជ្រើសរើសទៅលើការផ្ដោតអារម្មណ៍របស់អ្នក ព្រោះថាការចាប់អារម្មណ៍របស់អ្នកនឹងចិញ្ចឹមថាមពលដល់វាហើយរក្សាវាឲ្យនៅរស់ មិនមែនត្រឹមតែនៅក្នុងអ្នកនោះទេ ប៉ុន្តែនៅក្នុងសតិដឹងរួមគ្នាផងដែរ។»
២) «អានសៀវភៅដោយមនុស្សដែលអ្នកមិនយល់ស្របជាមួយ។ ស្ដាប់មនុស្សដែលគិតខុសពីអ្នក។ មើលកម្មវិធីទូរទស្សន៍ដែលអ្នកមិនសូវទម្លាប់មើល។ ចូរពង្រីកការគិតរបស់អ្នកនិងទស្សនរបស់អ្នកទៅលើពិភពលោក។ ស្របពេលដែលអ្នកគិតថាជំនឿរបស់អ្នកនិងបទពិសោធន៍របស់អ្នកត្រូវ មនុស្សដទៃក៏មានអារម្មណ៍ដូចគ្នាចំពោះជំនឿនិងបទពិសោធន៍របស់ពួកគេដែរ។ អ្នកនឹងរៀនសូត្របានច្រើនជាងអ្វីដែលអ្នកស្រមៃឃើញបើអ្នកមើលឃើញពិភពលោកតាមរយៈជំនឿជាជាងខុសនិងត្រូវ។»
៣) «អ្វីដែលអ្នកដទៃគិតឃើញចំពោះអ្នកមានទំនាក់ទំនងជាមួយនឹងទម្លាប់នៃការគិតរបស់ពួកគេច្រើនជាងអ្វីដែលជាអ្នកពិតប្រាកដ។ អ្នកជាអ្នកឥឡូវនេះ គឺត្រូវបានចម្រាញ់ចេញមកពីបទពិសោធន៍ជីវិត រឿងរ៉ាវដែលប៉ះពាល់ខ្លាំងដល់ផ្លូវចិត្ត ការខកចិត្ត ការឈឺចិត្ត និងសេចក្ដីទុក្ខអស់ជាច្រើនទសវត្ស។ វាគឺជាចំណាំងផ្លាតនៃរចនាសម្ព័ន្ធនៃការគិតរបស់ពួកគេ និងរឿងរ៉ាវអំពីជីវិត។ ការវាយតម្លៃរបស់ពួកគេមិនពាក់ព័ន្ធអ្វីជាមួយអ្នកទាំងស្រុងនោះទេព្រោះបទពិសោធន៍អំពីអ្នកមិនអាចកាត់ផ្ដាច់គ្នាពីបទពិសោធន៍របស់ពួកគេនៅក្នុងជីវិតនោះឡើយ។»
៤) «បើអ្នកចង់ដឹងថាទីណាដែលអ្នកអាចរកឃើញការរួមចំណែករបស់អ្នកទៅលើពិភពលោក ចូរសម្លឹងមើលរបួសរបស់អ្នក។ នៅពេលអ្នករៀនព្យាបាលពួកវា ចូរបង្រៀនអ្នកដទៃ។»
៥) «ការឈឺចាប់អាចនឹងធ្វើឲ្យអ្នករឹងមាំជាងមុននិងវៃឆ្លាតជាងមុនសម្រាប់រយៈពេលក្រោយ ប៉ុន្តែរៀនព្យាបាលការឈឺចាប់នោះនឹងធ្វើឲ្យអ្នកមានបញ្ញាជាងមុនពេញមួយជីវិតរបស់អ្នក។»
៦) «ខ្ញុំមិនមែននៅទីនេះសម្រាប់ការស្វែងយល់របស់អ្នកទៅលើថាតើខ្ញុំជានរណានោះឡើយ។ ខ្ញុំនៅទីនេះសម្រាប់ការស្វែងយល់របស់អ្នកទៅលើថាតើអ្នកជានរណា។ ខ្ញុំគឺជាកញ្ចក់របស់អ្នក។ របៀបដែលអ្នកយល់ឃើញចំពោះខ្ញុំ អ្វីដែលអ្នកមើលឃើញនៅក្នុងខ្ញុំ ការគិតដែលបានលេចឡើងចេញពីការជួបរបស់អ្នកជាមួយខ្ញុំ ការវាយតម្លៃដែលអ្នកមានចំពោះខ្ញុំ ទាំងអស់នេះសុទ្ធតែជាចំណាងផ្លាតនៃអ្នក។ ពួកវាមិនមានអ្វីពាក់ព័ន្ធជាមួយខ្ញុំឡើយ។»
ដោយ៖ ស្រីពៅ
អត្ថបទទាក់ទង៖ សម្ដីចំនួន៦ឃ្លាដកស្រង់ពីសៀវភៅ Sapiens: A Brief History of Humankind
