តើធ្វើយ៉ាងណាក្លាយជាអ្នកសរសេរសំណេរល្អគ្មានគូប្រៀបនៅថ្នាក់មហាវិទ្យាល័យ?
ដើម្បីកុំឲ្យមានភាពស្ទាក់ស្ទើរ ក្នុងការសរសេរសំណេរសម្រាប់ថ្នាក់មហាវិទ្យាល័យ អ្នកគួរតែយល់ដឹងឲ្យច្បាស់ពីតិចនិកក្នុងការសរសេរឲ្យបានច្បាស់លាស់។ ជាការពិតណាស់ បើសិនជាក្លាយជាអ្នកសរសេរល្អម្នាក់ហើយនោះ អ្នកគួរតែធ្វើឲ្យបានល្អលើសគេទៅមើលថាតើវាយ៉ាងណាវិញ? ខាងក្រោមនេះជាអ្វីដែលអ្នកគួរដឹង៖
១) កត់ទុកនូវគំនិតដែលអ្នកកំពុងមាន (Brainstorm)៖ ការចាប់ផ្ដើមសំណេរគឺពិតជាពិបាកបំផុត។ ហេតុនេះហើយ អ្នកគួរតែអនុញ្ញាតឲ្យគំនិតរបស់អ្នកធ្លាក់ចុះមក មិនថាវាចាកប្រធានឬក៏មិនសូវជាមានន័យអ្វីនោះទេ។ អ្នកគួរបណ្ដោយឲ្យគំនិតនោះផុសឡើង បន្ទាប់មកកត់ត្រាទុករួចចាំគិតវិភាគថាអ្វីខុសអ្វីត្រូវ។
២) ត្រូវសរសេរឲ្យត្រឹមត្រូវលក្ខខណ្ឌ៖ ដូចដែលអ្នកបានដឹងហើយថាសំណេរចែកចេញជា៣ផ្នែកផ្ដើមសេចក្ដី តួ សេចក្ដី និងសេចក្ដីបញ្ចប់។ ម្ល៉ោះហើយ អ្នកត្រូវមើលឲ្យបានច្បាស់ថាតើអ្នកសរសេរវាបានត្រឹមត្រូវលក្ខខណ្ឌនៃសំណេរហើយឬនៅ?
៣) គួរសួរខ្លួនឯងពីប្រធានដែលអ្នកចង់និយាយ៖ អ្នកត្រូវចេះសួរខ្លួនឯងថាប្រធានរបស់អ្នកគឺជាអ្វី ហើយព្យាយាមសរសេរបង្ហាញពីអ្វីដែលអ្នកចង់និយាយពីប្រធាន។ កុំព្យាយាមសរសេរតែអ្វីដែលមិនសំខាន់ ឬក៏វែងឥតប្រយោជន៍នោះព្រោះវានាំឲ្យសំណេរអ្នកទាំងមូលចាកប្រធានបាន។
៤) ពិនិត្យហើយបន្ថែមគំនិតឆ្នៃប្រឌិត៖ ដើម្បីទទួលបានសំណេរមួយដែលមិនគួរឲ្យធុញទ្រាន់ ហើយងាយទទួលបានការចាប់អារម្មណ៍ពីអ្នកដទៃនោះ។ អ្នកគប្បីចេះរួមបញ្ចូលគំនិតឆ្នៃប្រឌិតបន្ថែមទៀត ជាពិសេសគឺសំដៅលើពាក្យពេចន៍មានអត្ថន័យចំៗតែម្ដង។ អ្នកដទៃអាចនឹងទទួលបានគំនិតថ្មីៗនិងគំនិតគួរឲ្យភ្ញាក់ផ្អើលពីអ្នកបានថែមទៀតផង។
៥) ពិនិត្យម្ដងហើយម្ដងទៀត ៖ ការពិនិត្យចុះឡើងៗនេះនឹងជួយឲ្យអ្នកស្វែងរកកំហុសដែលមាននៅលើសំណេរ។ មនុស្សភាគច្រើនតែងមើលរំលងចំណុចនេះ ប៉ុន្សសម្រាប់អ្នកដែលផ្ចិតផ្ចង់ ចំពោះកិច្ចការ ពួកគេមិនដែលព្រងើយ កន្តើយចំណុចនេះទេ៕
ដោយ៖ ព្រំ សុវណ្ណកណ្ណិកា
