ការពិត ៦យ៉ាងដែលអ្នកត្រូវដឹង ដើម្បីពង្រឹងជំនាញរបស់អ្នកនៅសតវត្សទី ២១នេះ
ដូចលោក Alvin Toffler អ្នកនិពន្ធ និងអ្នកជំនួញជើងចាស់អាមេរិកធ្លាប់បានលើកឡើងដូច្នេះថា «អនក្ខរភាព (ភាពមិនចេះអក្សរ) នៃសតវត្សទី២១នេះ មិនមែនអ្នកមិនចេះអាន និងមិនចេះសរសេរនោះទេ។ ប៉ុន្តែវាសំដៅទៅលើអ្នកដែលមិនអាចរៀនបាន អ្នកដែលខ្ជិលរៀន និងអ្នកដែលមិនព្រមរៀនឡើងវិញ»
បើអញ្ចឹងមែន តើអ្នកគួររៀនជំនាញដែលត្រឹមត្រូវដោយរបៀបណា? តើរៀនជំនាញនោះអាចឲ្យអ្នកបានផលចំណេញមកវិញដែរឬអត់? ៦ ចំណុចខាងក្រោមនេះអាចជួយអ្នកបកស្រាយចម្ងល់នេះបាន។
១.រកឲ្យឃើញចំណេះដឹងដែលមានតម្លៃនៅក្នុងពេលដ៏ត្រឹមត្រូវមួយ
គុណតម្លៃនៃចំណេះដឹងមិនស្ថិតនៅមួយកន្លែងនោះទេ។ វាបានផ្លាស់ប្ដូរមុខងារដោយសារតែមនុស្សឲ្យតម្លៃវាដោយរបៀបណា និងវាកម្រឬអត់។ ដោយសារតែចូលមកដល់នៃបច្ចេកវិទ្យា និងការផ្លាស់ប្ដូរក្នុងវិស័យផ្សេងៗ គឺវាពិតជាចាំបាច់ណាស់ដើម្បីត្រូវការចេះជំនាញថ្មីៗទាំងនោះដែលផ្ដល់សក្ដានុពលកាន់តែខ្ពស់សម្រាប់ទទួលបានប្រាក់ចំណូល។ ពីព្រោះតែចង់បានប្រាក់ចំណូលខ្ពស់នេះហើយទើបធ្វើឲ្យមនុស្សជាច្រើនចាប់ផ្តើមរៀនជំនាញថ្មីៗឲ្យបានកាន់តែរហ័សតាមដែលអាចធ្វើទៅបាន ខណៈដែលការងារដែលបានប្រាក់ចំណូលទាបកាន់តែធ្លាក់ចុះទៅៗ។
២.រៀន និងពង្រឹងចំណេះដឹងនោះឲ្យបានឆាប់រហ័សបំផុត
ច្រកផ្លូវឈោងទៅចាប់យកឱកាសល្អៗសម្រាប់អ្នក គឺវាមិនមែនចេះតែកើតមានគ្រប់ពេលនោះទេ។ មនុស្សម្នាក់ៗ ត្រូវរហ័សស្រវាចាប់វាឲ្យបានលឿនបំផុតនៅពេលវាចូលមកដល់។ នេះមានន័យថា អ្នកត្រូវតែរៀនជំនាញថ្មីៗឲ្យបានលឿនបំផុតតាមដែលអាចធ្វើទៅបាន។ ការយល់ច្បាស់ និងការប្រើប្រាស់គំរូផ្លូវចិត្ត (Mental Models) គឺជាជំនាញសាកលដ៏សំខាន់បំផុតមួយដែលមនុស្សគ្រប់គ្នាគួរតែរៀនសូត្រ។ វាផ្តល់មូលដ្ឋានគ្រឹះដ៏រឹងមាំមួយសម្រាប់យកទៅអនុវត្តលើគ្រប់វិស័យទាំងអស់។ ដូចនេះនៅពេលដែលអ្នកចាប់ផ្ដើមចាប់យកជំនាញថ្មី ជំនាញដែលមានស្រាប់នេះនឹងជួយឲ្យអ្នកអាចរៀនជំនាញថ្មីបានឆាប់រហ័ស។
៣.ធ្វើឲ្យជំនាញរបស់អ្នកឲ្យមានតម្លៃដល់អ្នកដទៃ
ថ្វីត្បិតតែមនុស្សពីរនាក់មានជំនាញដូចគ្នាក៏ពិតមែន ក៏ប៉ុន្តែប្រាក់ខែ ឬថ្លៃឈ្នួលដែលពួកគេរកបានពីការប្រើប្រាស់ជំនាញរបស់ពួកគេមិនដូចគ្នាទេ។ វាតិច ឬច្រើនស្ថិតនៅត្រង់ថា បុគ្គលទាំងនោះអាចធ្វើឲ្យជំនាញរបស់ខ្លួនមានឥទ្ធិពល ប្រសិទ្ធភាព និងអាចបញ្ចូលអ្នកដទៃក្នុងកម្រិតណា។ សមត្ថភាពមួយនេះគឺត្រូវធ្វើឱ្យអ្នកដទៃជឿជាក់ថា ជំនាញដែលមានតម្លៃ គឺជា“ពហុជំនាញ” ។ មនុស្សជាច្រើនបានចំណាយពេលរាប់សិបឆ្នាំដើម្បីរៀនជំនាញបច្ចេកទេស ហើយស្ទើរតែគ្មានពេលរៀនពហុជំនាញនេះ។
៤.ប្រើចំណេះដឹងឲ្យជាលុយ និងចេញជាលទ្ធផល
មានវិធីសាស្ត្រច្រើនណាស់ដែលអាចប្រែក្លាយចំណេះដឹងរបស់អ្នកដែលអ្នកមានឲ្យមានតម្លៃនៅក្នុងជីវិតរបស់អ្នក។ មានឧទាហរណ៍មួយចំនួនសម្រាប់អ្នកនៅក្នុងករណីនេះដូចជា ស្វែងរកការងារណាដែលធ្វើឲ្យអ្នករកចំណូលបានច្រើន ធ្វើឲ្យខ្លួនឯងឡើងតំណែងកាន់តែខ្ពស់ កសាងអាជីវកម្មមួយឲ្យជោគជ័យ លក់ចំណេះដឹងតាមរយៈការប្រឹក្សាយោបល់ ឬក៏កសាងកេរ្តិ៍ឈ្មោះរបស់អ្នកតាមរយៈការពង្រឹងខ្លួនឯងឲ្យក្លាយទៅជាបុគ្គលល្បីល្បាញ និងមានចំណេះដឹងទូលំទូលាយម្នាក់។
៥.រៀនពីរបៀបប្រើលុយវិនិយោគលើចំណេះដឹងដើម្បីឲ្យទទួលបានផលចំណេញត្រឡប់មកវិញខ្ពស់
នៅយុគសម័យថ្មីនេះ មនុស្សម្នាក់ៗ ត្រូវតែស្វែងរកកម្មវិធីបណ្ដុះបណ្ដាល ឬមធ្យោបាយផ្តល់ចំណេះដឹងល្អៗដែលស័ក្ដិសមសម្រាប់ពង្រីកសមត្ថភាពរបស់អ្នកដូចជា ការអានសៀវភៅ រៀនវគ្គខ្លីៗតាមអនឡាញ ឬក៏ចូលរួមសិក្សាក្នុងកម្មវិធីបណ្ដុះបណ្ដាលរបស់សាលាផ្សេងៗជាដើមដើម្បីសម្រេចគោលដៅហិរញ្ញវត្ថុរបស់ខ្លួន។ ដើម្បីសម្រេចគោលដៅនេះបាន ការវិនិយោគលុយរបស់អ្នកទាំងនេះត្រូវផ្តោតលើចំណេះដឹងហិរញ្ញវត្ថុជារឿងសំខាន់ ដូចជាផលចំណេញមកវិញពីការវិនិយោគ (ROI) ការគ្រប់គ្រងហានិភ័យ (Risk Management) និងការគ្រប់គ្រងហិរញ្ញវត្ថុ (Financial management) ជាដើមដើម្បីធ្វើឲ្យខ្លួនអ្នកមានគ្រឹះក្នុងចំណេះដឹងវិនិយោគនេះ។
៦.ពង្រឹងជំនាញពីរបៀបរៀនសូត្រ
ធ្វើដូចនេះ វាជួយបង្កើនគុណតម្លៃគ្រប់ពេលដែលអ្នកលះបង់ក្នុងការរៀនសូត្រ (អត្រារៀនសូត្ររបស់អ្នកចេះតែកើនឡើង)។ អត្រារៀនសូត្ររបស់អ្នកនឹងកំណត់ថា តើសមត្ថភាពនៃចំណេះដឹងរបស់អ្នកកើនឡើងយ៉ាងឆាប់រហ័សកម្រិតណាទៅតាមពេលវេលាដែលអ្នកបានចំណាយ? អ្នកអាចសាកប្រៀបធៀបអ្នកដែលបានអានសៀវភៅមួយក្បាលចប់ក្នុងមួយសប្ដាហ៍ និងអ្នកដែលបានអានសៀវភៅមួយក្បាលចប់ដោយប្រើពេល ១០ថ្ងៃ។ នៅក្នុងរយៈពេលមួយឆ្នាំ អត្រាអ្នកអានសៀវភៅប្រើពេលមួយសប្ដាហ៍លឿនជាង ៣០% នៃអ្នកប្រើពេល១០ថ្ងៃ គឺអាចអានសៀវភៅបានរហូតដល់ទៅ ៨៥ក្បាលឯណោះ។
ដើម្បីងើបខ្លួនឲ្យផុតពីគំនិតងប់ងុលនឹងលុយទៅជាការស្វែងរកចំណេះដឹងដែលពិតប្រាកដមួយ អ្នកត្រូវឈប់គិតថា អ្នកត្រូវការរៀនត្រឹមតែ ៥ ទៅ ២២ ឆ្នាំប៉ុណ្ណោះ ហើយអាចស្វែងរកការងារល្អមួយបានធ្វើ និងដេកសោយសុខពេញមួយជីវិតនោះ។ ដើម្បីឲ្យជីវិតរបស់អ្នកជោគជ័យនៅយុគសម័យថ្មីនេះ អ្នកត្រូវតែរៀនជាប្រចាំ និងត្រូវរៀនពេញមួយជីវិតរបស់អ្នក៕
អត្ថបទទាក់ទង៖
សាស្ត្រាចារ្យសាលា Harvard និយាយថា ទៅពេលអនាគតអ្នកចេះជំនាញតែមួយ មិនជោគជ័យទេ
មេរៀន ៩យ៉ាងដែលនិស្សិតមហាវិទ្យាល័យត្រូវដឹង
ដោយ៖ ខេវិន
ប្រភព៖ medium
