សាស្ត្រាចារ្យ​សាលា​ Harvard និយាយថា ​ទៅពេលអនាគត​អ្នក​ចេះ​ជំនាញ​តែមួយ ​មិនជោគជ័យទេ​



ពិភពលោក​នៅ​ពេល​បច្ចុប្បន្ន​នេះ​កំពុង​លង់លក់​នឹង​ប្រព័ន្ធ​អប់រំ​មួយ​ដែល​ថា ​​ដើម្បី​ឲ្យ​អ្នក​មាន​អនាគត​ល្អ អ្នក​ត្រូវការ​តែ​​ជំនាញ​​អាជីព​ការងារ​​ច្បាស់លាស់​មួយ​​តែប៉ុណ្ណោះ​។ ពួកគេ​យល់​ថា នៅ​ពេល​ដែល​​ពួកគេ​​ចេះ​​ជំនាញ​អ្វី​មួយ​ពិតប្រាកដ ពួកគេ​នឹង​ក្លាយ​ជា​អ្នក​ជំនាញ​លើ​ការងារ​នោះ​ និង​មាន​សមត្ថភាព​កាន់តែ​ខ្លាំង​ ហើយ​ប្រាក់​នឹង​រត់​មក​រក​ពួកគេ​។ ផ្ទុយ​ទៅវិញ មនុស្ស​ដែល​មិន​មាន​ជំនាញ​​អាជីព​ការងារ​​ច្បាស់លាស់​ទៅ​វិញ​ទេ ដែល​ជា​ទូទៅ​ត្រូវ​បាន​គេ​ទាត់ចោល និង​មិន​ត្រូវ​បាន​យកចិត្ត​​ទុកដាក់​ពី​សង្គម។ 

ប៉ុន្តែ ទៅ​ពេល​អនាគត​ផ្នត់គំនិត​ទាំង​នេះ វា​នឹង​លែង​ជា​ប្រធានបទ​សំខាន់​ដូចមុន​ទៀតហើយ។ ផ្នត់​គំនិត​ដ៏​សំបូរ​បែប​នៃ​មនុស្ស​សម័យ​ថ្មី និង​ការ​បើកចំហ​របស់​ពិភពលោក​​​កាន់តែ​ទូលំទូលាយ​ជាង​មុន​បាន​​ឆ្លុះបញ្ចាំង​ថា អ្នក​ដែល​ចេះ​ជំនាញ​ទូទៅ ឬ ​ពហុ​ជំនាញ (Generalists) នឹង​​ឆក់​យក​​ភាព​ជោគជ័យ​​ច្រើន​ជាង​អ្នក​ដែល​​ចេះ​ជំនាញ​មួយ ឬ​ប៉ិនប្រសព្វ​មួយ​ (Specialists) ។ ភាព​រីកចម្រើន​យ៉ាង​ឆាប់រហ័ស​នៃ​បច្ចេកវិទ្យា​រួម​ជាមួយ​នឹង​ភាព​មិន​ប្រាកដប្រជា​ដែល​កំពុង​កើន​ឡើង​​នៅ​លើ​ពិភពលោក​​បាន​ធ្វើ​ឲ្យ​អ្នក​ដែល​​ពឹង​លើ​​ជំនាញ​​មួយ ​មិន​អាច​អភិវឌ្ឍ​ខ្លួន​ដើរ​ទាន់​អ្នក​ដែល​ចេះ​ជំនាញ​ទូទៅ​បាន​​ឡើយ​​​​។ 

ភាព​ស្មុគស្មាញ​នា​ពេល​បច្ចុប្បន្ន​នេះ​ទាមទារ​នូវ​សមត្ថភាព​ដើម្បី​គ្រប់គ្រង​​ស្ថានភាព​ដែល​​​​ច្របូកច្របល់ និង​មិន​ច្បាស់លាស់​​។ វា​​បង្កើត​ឲ្យ​មាន​ការ​ព្រួយបារម្ភ​សម្រាប់​មនុស្ស​ភាគច្រើន​ពី​ព្រោះ​ថា វា​នឹង​មាន​សុវត្ថិភាព​​ជាង​នេះ​​ដើម្បី​ត្រៀម​ខ្លួន​ធ្វើ​ជា​មនុស្ស​ដែល​មាន​មាន​ជំនាញ​ទូលំទូលាយ​។ នេះ​បើ​យោង​តាម​ការ​លើកឡើង​របស់​លោក​សាស្ត្រាចារ្យ Vikram Mansharamani  មក​ពី​សាកលវិទ្យាល័យ Harvard។ 

ពិត​ឬ​មិន​ពិត​អ្នក​អាច​សាក​ក្រឡេក​មើល​ពាក់​មួយ​ចំនួន​​ដែល​​ត្រូវ​បាន​គេ​អនុវត្ត​ក្នុង​មុខ​ជំនួញ​​អស់​រយៈពេល ៤០ ទៅ​ ៥០​ឆ្នាំ​ចុងក្រោយ​ដូចជា សមត្ថភាព​​ស្នូល (Core Competence) ជំនាញ​ពិសេស (Unique Skills) និង​​ឯកទេស​ស៊ីជម្រៅ (Deep Expertise)។ ដូច​អ្វី​ដែល​អ្នក​បាន​ចងចាំ កូនសោ​ដើម្បី​ភាព​ជោគជ័យ គឺ​​ការ​អភិវឌ្ឍ​ជំនាញ​មួយ​របស់​អ្នក​ដើម្បី​​​ឲ្យ​អាជីព​ការងារ​របស់​អ្នក​ឡើង​កាន់តែ​ខ្ពស់​ថែមទៀត។ នេះ​ជា​ក្បូន​ដែល​អ្នក​​អ្នក​ជោគជ័យ​នៅ​លើ​ពិភពលោក​បាន​អនុវត្ត​អស់​រយៈពេល​ជា​ច្រើន​ទសវត្ស​មក​ហើយ។ 

អនាគត​ពិភពលោក​គ្រប់គ្រង​ដោយ​អ្នក​ដែល​​ចេះ​ជំនាញ​ទូទៅ​ (Generalists) 
យ៉ាងណាមិញ វា​មិន​គ្រប់គ្រាន់​ទេ​​ដើម្បី​​ក្លាយ​ជា​វេជ្ជបណ្ឌិត​ម្នាក់​។ អ្នក​ត្រូវ​មាន​ជំនាញ​បន្ថែម​ទៀត​ដែល​នោះ​ប្រហែល​ជា​​ជំនាញ​ផ្នែក​បេះដូង។  ប៉ុន្តែ​ក្រោយមក​​ទៀត វា​មិន​គ្រប់គ្រាន់​ទេ​ដើម្បី​ធ្វើ​ជា​គ្រូពេទ្យ​ឯកទេស​​ផ្នែក​ជំងឺ​បេះដូង​​នោះ ​អ្នក​ត្រូវ​មាន​ជំនាញ​បន្ថែម​ទៀត​ដូចជា​ គ្រូពេទ្យ​វះកាត់​បេះដូង​ផង​ដែរ។ ​វា​មិនមែន​កើត​មាន​​នៅ​ក្នុង​វិស័យ​វេជ្ជសាស្ត្រ​​មួយ​ប៉ុណ្ណោះ​ទេ ​អាជីព​ការងារ​ដែល​មាន​នៅ​ក្នុង​វិស័យ​ផ្សេងៗ​ទៀត​ក៏​មាន​លក្ខណៈ​ដូចៗ​គ្នា​នេះ​ដែរ។ 

មាន​ឧទាហរណ៍​​មួយ​ទៀត​គឺ​ថា កម្មករ​សំណង់​​ម្នាក់​ដែល​មាន​តែ​ញញួរ​​ គឺ​វា​អាច​យក​​ទៅ​ប្រើ​តម្រូវ​ក្បាល​ដែកគោល​តែប៉ុណ្ណោះ។ ប៉ុន្តែ​​សាក​ស្រមៃ​មើល​ប្រសិន​បើ​កម្មករ​សំណង់​នោះ​មាន​ញញួរ​ផង មាន​​ទួរណឺវិស​ផង និង​មាន​ម៉ាឡេត តើ​គាត់​អាច​ធ្វើ​អ្វី​បាន​ខ្លះ? គាត់​មិន​ខ្វល់​ថា ​​ផ្គុំ​ជញ្ជាំង​ឈើ​មួយ​ឲ្យ​​ជាប់​គ្នា​​ត្រូវ​​ប្រើ​ដែកគោល ឬ​ខ្ចៅ​មូល​រឹត​​​នោះ​ទេ គឺ​គាត់​​មាន​ជម្រើស​​ច្រើន​ណាស់​ដើម្បី​ប្រើ​បច្ចេកទេស​​ធ្វើ​ឲ្យ​ជញ្ជាំង​នោះ​ជាប់​គ្នា​។ ​​​​​​​

នេះ​មិនមែន​មានន័យ​ថា ភាព​ប៉ិនប្រសព្វ​ ឬ​ចេះ​លើ​ជំនាញ​មួយ​ច្បាស់លាស់​មក​ធ្វើ​ជា​អាជីព​ចិញ្ចឹម​ជីវិត​វា​គ្មាន​ប្រយោជន៍​នោះ​ទេ​នៅ​ពេល​អនាគត ហើយ​ការ​ដែល​កម្មករ​សំណង់​ដែល​មាន​តែ​ញញួរ​មួយ​​​ក៏​មិន​មាន​បញ្ហា​អ្វី​ដែរ។  ក៏ប៉ុន្តែ​គ្រាន់តែ​ថា ពិភពលោក​នៅ​ពេល​បច្ចុប្បន្ន​នេះ​កំពុង​ប្រែប្រួល​ឥត​ឈប់ឈរ​ ហេតុដូច្នេះ​ហើយ​​កម្មករ​សំណង់​​ដែល​មាន​សម្ភារៈ​សំណង់​​​សំបូរ​បែប​​នៅ​ក្នុង​ដៃ នឹង​អាច​ដោះស្រាយ​បញ្ហា​​សាងសង់​មួយ​​​បាន បាន​ច្រើន​របៀប។  នេះ​មានន័យ​ថា ដើម្បី​អាច​ដើរ​ទៅ​មុខ​បាន​វែងឆ្ងាយ ភាព​រហ័សរហួន និង​​ភាព​បត់បែន​គឺ​ជា​រឿង​សំខាន់​ខ្លាំង​ណាស់។ 

​​​​​តើ​​អ្នកចេះ​ជំនាញ​ទូទៅ​ (Generalist)​មានន័យ​ដូចម្ដេច?
តើ​មនុស្ស​ម្នាក់​អាច​អភិវឌ្ឍ​ខ្លួន​ជា​មនុស្ស​​ដែល​មាន​ជំនាញ​ទូទៅ​​ដោយ​របៀបណា? ដើម្បី​ចាប់​ផ្ដើម  ការ​សម្លឹង​មើល​ទៅ​ពិភព​ខាងក្រៅ​គឺ​ជា​រឿង​សំខាន់ ហើយ​អ្នក​ត្រូវ​យកចិត្ត​ទុកដាក់​ទៅ​លើ​បរិបទ​ដែល​អ្នក​ធ្វើ​ការ​សម្រេចចិត្ត។ អ្នក​ត្រូវ​អាន​អត្ថបទ​ទាំងមូល មិនមែន​ត្រឹម​ចំណុច​ដែល​ទាក់ទង​ទៅ​នឹង​​ការងារ​​របស់​អ្នក​នោះ​ទេ។ តើ​ព័ត៌មាន​ប្រេងឆៅ​ និង​ឧស្ម័ន​​ជា​ចំណាប់អារម្មណ៍​ដំបូង​របស់​អ្នក​ដែល​ត្រូវ​អាន​ព្រឹក​នេះ​ឬ​អត់? សូម​សិក្សា​ឲ្យ​លម្អិត​ពី​​សក្ដានុពល​ដែល​ជះឥទ្ធិពល​ដល់​វិស័យ​លក់រាយ​របស់​វា​។ តើ​អ្នក​ជា​អ្នក​វិជ្ជាជីវៈ​ខាង​ហិរញ្ញវត្ថុ​​មែន​ទេ? ហេតុអ្វី​អ្នក​មិន​អាន​សៀវភៅ​​ដែល​និយាយ​ពី​ទីផ្សារ? សូម​គិត​ឲ្យ​កាន់តែ​ធំ និង​​សម្លឹង​មើល​ឲ្យ​បាន​វែងឆ្ងាយ​ជាង​អ្វី​ដែល​​ទំនៀមទម្លាប់​ប្រពៃណី​បង្រៀន​អ្នក​នៅ​ពេល​កន្លងមក។

យុទ្ធសាស្ត្រ​មួយទៀត​គឺ​អ្នក​​ត្រូវ​គិត​អំពី​របៀប​អភិវឌ្ឍ​ដែល​មិន​ទាក់ទង​គ្នា​អាច​ជះឥទ្ធិពល​ឲ្យ​គ្នា​ទៅវិញទៅមក  ពោល​គឺ​អ្វី​មួយ​ដែល​អ្នក​គិត​ជា​ប្រព័ន្ធ ​​​អនុវត្ត​តាម​បែប​ធម្មជាតិ។ វា​ទាមទារ​ឲ្យ​អ្នក​សិក្សា​ស្វែងយល់​ពី​ការ​​ទំនាក់ទំនង​​ទៅ​វិញ​ទៅ​មក​នៃ​វិស័យ​នីមួយៗ ហើយ​​សាក​ស្រមៃ​មើល​ថា តើ​ការ​ផ្លាស់ប្ដូរ​នៅ​ក្នុង​​វិស័យ​មួយ​វា​មាន​ផល​រំខាន​ដល់​​វិស័យ​ផ្សេង​ទៀត​ដែរ​ឬ​អត់?

​ដោយសារតែ​អ្នក​មាន​ជំនាញ​ទូទៅ​ (Generalist) មាន​សំណុំ​​​ឧបករណ៍ ឬ​ធនធាន​មធ្យោបាយ​ជា​ច្រើន​នៅ​ក្នុង​ដៃ ​ពួកគេ​អាច​សម្រប​ខ្លួន​​បាន​​គ្រប់​ស្ថានភាព និង​អាច​ឆ្លើយតប​ទៅ​នឹង​ការ​វិវត្ត​នានា​បាន​។ អ្នក​គ្រាន់តែ​គិត​មើល​ថា តើ​​ពិភពលោក​បាន​ផ្លាស់ប្ដូរ​យ៉ាង​ឆាប់រហ័ស​ជាមួយ​នឹង​ការ​អភិវឌ្ឍ​បច្ចេកវិទ្យា និង​​អ៊ីនធឺណិត​ដោយ​របៀបណា? មហាសេដ្ឋី Jeff Bezos ប្រធាន​ក្រុមហ៊ុន Amazonមិនមែន​ជា​អ្នក​ជំនាញ​ផុតលេខ​ខាង​​វិស័យ​លក់រាយ​​តាមរយៈ​ការ​ផ្ដួល​គូប្រជែង​​ឲ្យ​រាប​ដល់​ដី​​​នោះ​ទេ​​។ លោក​គឺ​ជា​អ្នក​​លក់រាយ​ចំណូល​ថ្មី​​ ប៉ុន្តែ​​លោក​អាច​សម្រប​ខ្លួន​បាន​យ៉ាង​ឆាប់រហ័ស​ដើម្បី​ចាប់​យក​ឱកាស​ដ៏​មហិមា​អាច​​​កសាង​ក្រុមហ៊ុន​លំដាប់​ពិភពលោក​បាន។ 

​អាជីព​ជោគជ័យ​សម្រាប់​អ្នក​​មាន​ជំនាញ​ទូទៅ (Generalist)
ក្រុមហ៊ុន​ជា​ច្រើន​កំពុង​ចាប់​អារម្មណ៍​ខ្លាំង​សម្លឹង​មើល​នរណា​ដែល​មាន​បទពិសោធន៍​ និង​ជំនាញ​សំបូរ​បែប​នៅ​ពេល​ជួល​បុគ្គលិក។ នេះ​មាន​សារសំខាន់​ខ្លាំង​ណាស់​​សម្រាប់​ក្រុមហ៊ុន ឬ​ស្ថាប័ន​ធំៗ​ដូច​ជា​ក្រុមហ៊ុន Google ជាដើម​ដែល​ក្រុមហ៊ុន​នេះ​ល្បី​ឈ្មោះ​ថា មាន​បុគ្គលិក​​លោត​ផ្លោះ​ពី​មុខតំណែង​មួយ​ទៅ​មុខតំណែង​មួយ​ទៀត​  ពី​តួនាទី​មួយ​ទៅ​កាន់​តួនាទី​មួយ​ទៀត។ 

បើ​យោង​តាម​ប្រសាសន៍​របស់​លោកស្រី Lisa Stern ទទួល​បន្ទុក​ផ្នែក​ជ្រើសរើស​បុគ្គលិក​របស់​ក្រុមហ៊ុន​នេះ​បាន​ឲ្យ​ដឹង​ថា ក្រុមហ៊ុន​លោកស្រី​ឲ្យ​តម្លៃ​​​លើ​បុគ្គលិក​ណា​ដែល​ពូកែ​​ដោះស្រាយ​បញ្ហា​ ​និង​មាន​សមត្ថភាព​​ផ្នែក​ចំណេះដឹង​​ទូទៅ​​​ដែល​ពាក់ព័ន្ធ​នឹង​មុខតំណែង​របស់​ខ្លួន។ លោកស្រី​បន្ត​ថា បើ​ Google ជ្រើសរើស​បុគ្គលិក​​ចេះ​​តែ​ជំនាញ​មួយ ខណៈ​ដែល​ក្រុមហ៊ុន​ត្រូវការ​ផ្លាស់ប្ដូរ​ឥត​ឈប់ឈរ​ នោះ​​​ក្នុង​បរិបទ​នេះ ការ​ជ្រើសរើស​បុគ្គលិក​មាន​ជំនាញ​ទូទៅ​ដ៏​ឆ្លាត​ម្នាក់​គឺ​ជា​រឿង​ចាំបាច់​ជាង។ ​

លោកស្រី​បាន​ផ្តល់​ដំបូន្មាន​ថា ប្រសិនបើ​អ្នក​ទើប​ប្រឡូក​ក្នុង​វិស័យ​ការងារ​ជា​​លើក​ដំបូង អ្នក​ត្រូវ​គ្រប់គ្រង​អាជីព​ការងារ​របស់​អ្នក​​ឲ្យ​ទទួល​បាន​បទពិសោធន៍​​ផ្នែក​ភូមិសាស្ត្រ​ផ្សេងៗ​គ្នា​ និង​មុខតំណែង​​​​​សំបូរ​បែប​​។ សមត្ថភាព​​ក្នុង​ការ​វិភាគ (ឧ. ជំនាញ​វិភាគ​លើ​មូលដ្ឋានគ្រឹះ​​ស្ថិតិ និង​​ការ​ត្រិះរិះ​ពិចារណា)  គឺ​​សុទ្ធតែ​ជា​ជំនាញ​ដែល​អ្នក​​គូរ​អភិវឌ្ឍ ​ព្រោះ​វា​នឹង​ធ្វើ​ឲ្យ​អ្នក​យក​ឈ្នះ​អ្នក​ដែល​ផ្តោត​​លើ​ជំនាញ​ជាក់លាក់​មួយ។ ​ 

ភាព​ប្រាកដប្រជា​មួយ​អំពី​អនាគត​របស់​អ្នក គឺ​ថា​វា​នឹង​មិន​ប្រាកដប្រជា​ទេ​។ ​ភាព​រីកចម្រើន​យ៉ាង​ឆាប់រហ័ស​នៃ​បច្ចេកវិទ្យា​បញ្ញា​សិប្បនិម្មិត (AI) និង​​បច្ចេកវិទ្យា​ច្នៃប្រឌិត (Technology Innovation) បាន​បង្កើត​ឲ្យ​មាន​ព័ត៌មាន​​គ្រប់​សព្វ​បែប​យ៉ាង​។ មនុស្ស​ដែល​​ប៉ិនប្រសព្វ​លើ​ជំនាញ​តែមួយ​ ​កំពុង​បាត់បង់​តម្លៃ​បន្តិចម្តងៗ។   ជំនាញ​ដ៏​សំខាន់​សម្រាប់​ពេល​អនាគត​គឺ​មិនមែន​​ពឹង​លើ​ជំនាញ​ពិតប្រាកដ​មួយ​នោះ​ទេ​។ វា​គឺ​ស្ថិត​នៅ​ត្រង់​ថា តើ​អ្នក​មាន​​វិធីសាស្ត្រ ទស្សនវិស័យ​និង​វិធី​គិត​​ដ៏​ច្រើន​សំបូរ​បែប​កម្រិត​ណា?  ហើយ​ជា​ការ​សំខាន់​ណាស់​ដែរ​ថា ​​​អ្នក​​ត្រូវ​​​អនុវត្ត​វា​ឲ្យ​បាន​ឆាប់​តាម​ដែល​អ្នក​អាច​ធ្វើ​បាន​​៕

អត្ថបទទាក់ទង៖

ដោយ៖ ខេវិន
ប្រភព៖ CNBC 

X
5s