អនុវត្តបាន ៣ វិធីនេះដឹងតែជាប់នៅក្នុងដំណាក់កាលសាកល្បងការងារជាមិនខាន!
ជាគោលការណ៍ ដំណាក់កាលសាកល្បងការងារ (Probationary Period) របស់ក្រុមហ៊ុនទូទៅសម្រាប់បុគ្គលិកដែលចូលថ្មី គឺមានរយៈពេល ៩០ថ្ងៃ ឬ ៣ខែ។ គោលបំណងនៃការបង្កើតគោលការណ៍នេះឡើងគឺដើម្បីឲ្យក្រុមហ៊ុនធ្វើការវាយតម្លៃទៅលើសមត្ថភាព និងលទ្ធផលការងាររបស់បុគ្គលិកចូលថ្មីនោះជាមុនថា តើខ្លួនគួរអនុញ្ញាតឲ្យបុគ្គលិកនោះបន្តធ្វើការជាបុគ្គលិកពេញសិទ្ធិឬយ៉ាងណា?
នៅក្នុងដំណាក់កាលនេះ ពេលខ្លះអ្នកមិនទុកចិត្តលើខ្លួនឯង ហើយដាក់ការសង្ស័យថា ខ្លួនអាចមិនជាប់នៅក្នុងដំណាក់កាលសាកល្បងការងារនេះ។ ក៏ប៉ុន្តែអ្នកគួរមានភាពជឿជាក់លើខ្លួនឯង និងគួរអនុវត្តគន្លឹះ៣សំខាន់ៗខាងក្រោមនេះជាមុនសិន ប្រសិនបើអ្នកចង់ជោគជ័យនៅក្នុងដំណាក់កាលសាកល្បងនេះ។
១.ស្វែងយល់ឲ្យបានច្បាស់ថា ក្រុមហ៊ុនរំពឹងចង់បានអ្វីពីអ្នក
ជំហានទីមួយនេះគឺចាប់ផ្តើមភ្លាមនៅពេលដែលអ្នកសម្រេចចិត្តទទួលយកការងារនៅ កន្លែងថ្មីរបស់អ្នក។ នៅដំណាក់កាលនេះ អ្នកត្រូវប្រាកដថា អ្នកនិងអ្នកគ្រប់គ្រងរបស់អ្នកបានយល់ច្បាស់លាស់ពីអ្វីដែលក្រុមហ៊ុនរបស់អ្នកចង់បានពីអ្នកនៅក្នុងរយៈពេល ៣ខែដំបូងនេះ។ ហេតុដូច្នេះហើយ វាជារឿងសំខាន់ដែលអ្នក គួរតែដឹងច្បាស់ពីគោលបំណង គោលដៅ និងការរំពឹងទុកក្រុមហ៊ុនរបស់អ្នកថា ជាអ្វី ហើយបន្ទាប់មកត្រៀមខ្លួនបំពេញការងារឲ្យពីសមត្ថភាពស្របតាមអ្វីដែលរំពឹងទុកនោះ។ ជាទូទៅ ការរំពឹងទុករបស់ក្រុមហ៊ុននីមួយៗនៅក្នុងរយៈពេល ៣ ខែនេះ គឺមានច្រើនចាប់ពី ២ ឡើងទៅដូចជា សមត្ថភាព វប្បធម៌ធ្វើការល្អ ភាពច្នៃប្រឌិត និងបុគ្គលិកលក្ខណៈរបស់អ្នកជាដើម។
២.ធ្វើឲ្យបានច្រើនលើសពីការរំពឹងទុក
វិធីមួយទៀតដើម្បីអាចឲ្យអ្នកអាចជោគជ័យក្នុងដំណាក់កាលសាកល្បងការងារនេះ គឺការធ្វើការងារឲ្យបានច្រើនលើសពីអ្វីដែលចៅហ្វាយរបស់អ្នកដាក់ឲ្យធ្វើ ឬឲ្យលើសពីការរំពឹងទុក។ បើទោះបីជាអ្នកធ្លាប់មានបទពិសោធន៍ច្រើននៅកន្លែងមុនៗក៏ដោយ វាមិនប្រាកដនោះឡើយដែលថា អ្នកអាចសម្របខ្លួនទៅនឹងវប្បធម៌ធ្វើការនៅកន្លែងថ្មី និងអាចសម្រេចដូចការរំពឹងទុករបស់មនុស្សនៅជុំវិញអ្នកឡើយ។ នេះមានន័យថា គោលដៅបន្ទាប់របស់អ្នក គឺត្រូវខិតខំបំពេញការងារឲ្យបានច្រើនលើសការរំពឹងទុក។
មុនដំបូង បង្កើតគោលដៅដែលអ្នកចង់សម្រេចឲ្យបាន មនុស្សដែលអ្នកត្រូវជួប និងធនធានដែលអ្នកត្រូវការដើម្បីគាំទ្រឲ្យការងារទទួលបានលទ្ធផលល្អឡើង។ បន្ទាប់មកបង្ហាញលទ្ធផលបណ្តើរៗឲ្យចៅហ្វាយរបស់អ្នកបានឃើញថា ការងាររបស់អ្នកមានផលិតភាព។ រីឯនៅចំណុចចុងក្រោយ អ្នកត្រូវកំណត់ឲ្យឃើញពីបញ្ហាដែលជាមូលហេតុក្រុមហ៊ុនជួលអ្នកមកឲ្យដោះស្រាយ។ សូមចាំថា អ្នកមិនចាំបាច់ដោះស្រាយបញ្ហាទាំងអស់នោះឲ្យបាននៅត្រឹមរយៈពេល ត្រឹម ៩០ថ្ងៃនោះទេ។ អ្នកគ្រាន់តែបង្ហាញចៅហ្វាយរបស់អ្នកថា អ្នកពិតជាមានការប្ដេជ្ញាចិត្តក្នុងការដោះស្រាយបញ្ហានោះ ហើយសម្រេចបានលទ្ធផលបន្តបន្ទាប់ពិតប្រាកដមែន។
៣.ធ្វើបទបង្ហាញដ៏ល្អមួយទៅកាន់ក្រុមការងារ
នៅក្នុងរយៈពេល ៣ ខែនៃការសាកល្បងការងារនេះ អ្នកគួររៀបចំការប្រជុំមួយ ហើយអ្នកត្រូវធ្វើបទបង្ហាញប្រកបដោយវិជ្ជាជីវៈ និងមានតម្លៃសម្រាប់អ្នកចូលរួមដែលពាក់ព័ន្ធទៅ នឹងលទ្ធផលការងាររបស់អ្នក។ នៅពេលធ្វើបទបង្ហាញ បើទោះបីជាកិច្ចប្រជុំនោះមិនផ្លូវការក្តី ឬផ្លូវការក្តី អ្នកត្រូវពិនិត្យឡើងវិញពីគោលបំណងរបស់អ្នក និងវាយតម្លៃលទ្ធផលរបស់អ្នក។ ជាទូទៅ ចៅហ្វាយរបស់អ្នកចង់ដឹងថា តើអ្នកបានរួមចំណែកផ្តល់ផលជាវិជ្ជមានក្នុងកម្រិតណាដល់ភាពជោគជ័យរបស់ក្រុមហ៊ុន? វាជារឿងល្អណាស់ ប្រសិនបើអ្នកលើកឡើងពីសមិទ្ធផលរបស់អ្នកជាទិន្នន័យ ជាជាងបានត្រឹមតែមតិ ឬទស្សនៈយល់ឃើញ។
បន្ទាប់ពីបានពិនិត្យមើលការអនុវត្តការងាររបស់អ្នកសម្រាប់រយៈពេល ៣ខែបានចប់សព្វគ្រប់អស់ហើយ អ្នកគួរឆ្លៀតឱកាស បង្កើតនិងបង្កើនទំនាក់ទំនងតាមរយៈការផ្ញើអ៊ីមែល ឬ ស្នើសុំក្រុមការងារដែលពាក់ព័ន្ធសំខាន់ៗដើម្បីសង្ខេប វាយតម្លៃការងាររយៈពេល ៩០ ថ្ងៃដំបូងរបស់អ្នក។ ទន្ទឹមនឹងនេះ អ្នកគួរសរសេរថ្លែងអំណរគុណ ដល់អ្នកទាំងនោះដែលបានចូលរួមការវាយតម្លៃនេះ ព្រមទាំងបង្ហាញពួកគេពីផែនការអនាគតរបស់អ្នក។ ចំណាប់អារម្មណ៍របស់អ្នកពិតជាសំខាន់ណាស់ ហើយបើអ្នកបានបំពេញចំណុចទាំងអស់នេះ ចៅហ្វាយរបស់អ្នកនឹងពិបាកក្នុងការបញ្ឈប់អ្នកណាស់៕
ប្រភព៖ theladders
