ការ​ស្រាវជ្រាវ​ថ្មី​បង្ហាញ​ពី​​ជំនាញ​ចំនួន ៥ ​​ដែល​អ្នក​គ្រប់គ្រង​​នៅ​មាន​ចំណុច​ខ្វះខាត​បំផុត​



ការ​កសាង​ជំនាញ​ភាព​ជា​អ្នកដឹកនាំ​ឲ្យ​មាន​ប្រសិទ្ធភាព​បំផុត​មួយ គឺ​ជា​ប្រធានបទ​ដ៏​រសើប​មួយ​របស់​អ្នក​គ្រប់គ្រង​ជា​ច្រើន។ ទន្ទឹម​នឹង​នេះ ​វា​ក៏​មិនមែន​ជា​រឿង​ងាយស្រួល​ដែរ​សម្រាប់​អ្នក​គ្រប់គ្រង​ម្នាក់ៗ​ដើម្បី​​អនុវត្ត​វិធី​ទាំង​នោះ​ឲ្យ​មាន​ប្រសិទ្ធភាព​ ខណៈ​ដែល​​បញ្ហា​ប្រឈម​ថ្មីៗ​​សម្រាប់​ការ​ដឹកនាំ​ស្ថាប័ន​​ចេះ​តែ​កើត​មាន​ឡើង​កាន់តែ​ច្រើន​​នៅ​យុគសម័យ​ទំនើប​នេះ។ ​

ទោះបី​ជា​បែប​នេះ​ក្តី បើ​យោង​តាម​របាយការណ៍ គ្រប់គ្រង​មនុស្ស​ប្រចាំ​ឆ្នាំ ២០០៩ (2019 people Management Report) បាន​​រក​ឃើញ​​នូវ​ជំនាញ ៥ ដែល​អ្នក​គ្របគ្រង​នៅ​មាន​ចំណុច​ខ្វះខាត​ជាងគេ។ របាយការណ៍​នេះ​បាន​ធ្វើ​មតិ​ទៅ​លើ​បុគ្គលិក ១ ០០០ នាក់ ​ហើយ​វា​បាន​បង្ហាញ​លទ្ធផល​ដូច​តទៅ៖ ​

១.ការ​បង្កើត​ក្រុម​ការងារ
​តាម​របាយការណ៍​គ្រប់គ្រង​មនុស្ស (People Management Report) បាន​បង្ហាញ​ថា បុគ្គលិក ២៨% និយាយ​ថា ការ​​បង្កើត​ក្រុម​ការងារ​ធ្វើ​ការងារ​​ជា​ក្រុម​គឺ​ជា​​ជំនាញ​មួយ​ដែល​អ្នកដឹកនាំ​​ខ្វះ​ច្រើន​​ជាងគេ ទោះបី​ជា​​អ្នកដឹកនាំ​ទាំង​នោះ​ស្ថិត​នៅ​ក្នុង​លំដាប់​ថ្នាក់​​ដឹកនាំ​កម្រិត​កំពូល​ក៏ដោយ។ ការ​បង្កើត​ក្រុម​ការងារ​ឡើង គឺ​ជា​ការ​​ប្រមូលផ្ដុំ​​បុគ្គលិក​របស់​អ្នក​​​​​គ្រប់​ជាន់ថ្នាក់​​ទាំងអស់​ឲ្យ​​​ធ្វើ​ការ​ជា​ក្រុម​ដោយ​មិន​​ប្រកាន់​ឋានៈ​តួនាទី​ដើម្បី​សម្រេច​ផែនការ​ការងារ​របស់​ស្ថាប័ន។  វា​ជា​​យុទ្ធសាស្ត្រ​​មួយ​ដែល​​​ជួយ​លើក​កម្ពស់​ទៅ​ដល់​ភាព​ច្នៃប្រឌិត ការ​ទទួល​បាន​គំនិត​ថ្មីៗ គុណភាព​ការងារ និង​ការ​សហការ ​​សម្រាប់​ដោះស្រាយ​បញ្ហា​ផ្សេងៗ​​ក្នុង​ស្ថាប័ន​ក្នុង​ន័យ​​ធ្វើ​​យ៉ាងណា​​ឲ្យ​ក្រុមហ៊ុន​របស់​អ្នក​រីកចម្រើន​ទៅ​មុខ​។

២.ការ​ផ្ដល់​មតិ​រិះគន់​កែលំអ​
បុគ្គលិក​ ១៧% ផ្សេងទៀត​និយាយ​ថា ភាព​ខ្វះចន្លោះ​ដ៏​ធំ​បំផុត​របស់​អ្នក​គ្រប់គ្រង​  គឺ​ការ​​​ផ្ដល់​មតិ​រិះគន់​កែលំអ​​​ទៅ​កាន់​បុគ្គលិក​។ ​អ្នក​គ្រប់គ្រង​ជា​ច្រើន​​ទំនង​ជា​ស្ទាក់ស្ទើរ​ក្នុង​ការ​រិះគន់​​ចំៗ​ដល់​បុគ្គលិក​មួយ​ចំនួន​ដោយ​បារម្ភ​ថា​វា​នឹង​អាច​​បង្ក​ឲ្យ​​មាន​​ភាព​ថ្នាំងថ្នាក់ ឬ​ការ​បែកបាក់​ក្នុង​ស្ថាប័ន​។  ក៏ប៉ុន្តែ​​ការ​ពិត​ទៅ មតិ​រិះគន់​កែលំអ​នេះ​គឺ​ពិត​ជា​សំខាន់​ណាស់​សម្រាប់​អភិវឌ្ឍន៍​បុគ្គលិក។  មតិ​រិះគន់​របស់​អ្នក​គួរតែ​មាន​​ការ​ឆ្លើយតប​ទាន់​ពេលវេលា​ និង​ជាក់លាក់​បំផុត​។ សូម​កុំ​រង់ចាំ​យូរ​ពេក​ដោយ​គ្រាន់តែ​ដើម្បី​ចែករំលែក ឬ​ផ្ដល់​​អនុសាសន៍​សំខាន់​​ៗ​សម្រាប់​កែលំអ។  សំខាន់​ជាង​នេះ​ទៅទៀត ត្រូវ​​រិះគន់​ដោយ​ភាព​ស្មោះត្រង់ ហើយ​គាំទ្រ​ពួកគេ​។ នោះ​មាន​ន័យ​ថា​ អ្នក​ត្រូវ​បង្ហាញ​ការ​អបអរ​សាទរ​​ចំពោះ​ភាព​ជោគជ័យ​របស់​បុគ្គលិក និង​បង្ហាញ​ថា ពួកគេ​ពិត​ជា​បាន​រៀន​សូត្រ​​ពី​កំហុស​ខុសឆ្គង​ទាំង​នោះ។

៣.ការ​គ្រប់គ្រង​ពេលវេលា
ចំណុច​ខ្សោយ​មួយ​ទៀត​ដែល​​​មាន​ប្រជាប្រិយ​បំផុត​ទី៣​របស់​អ្នក​គ្រប់គ្រង​ គឺ​ការ​គ្រប់គ្រង​ពេលវេលា​។ បុគ្គលិក ១៤% និយាយ​ថា អ្នក​គ្រប់គ្រង​របស់​ខ្លួន​មាន​ចំណុច​ខ្វះខាត​លើ​ចំណុច​នេះ។ ពួកគេ​និយាយ​ថា ការ​គ្រប់គ្រង​ពេលវេលា​មិន​មាន​ប្រសិទ្ធភាព​របស់​ថ្នាក់​លើ​បាន​ធ្វើ​ឲ្យ​រាំងស្ទះ​ដល់​ការងារ​ដល់​ថ្នាក់​ក្រោម​ដែល​ត្រូវការ​ឆ្លើយតប​យល់ព្រម​ជា​បន្ទាន់​​​ពី​ថ្នាក់​លើ​ចំពោះ​ការងារ​ជា​ច្រើន​មុន​នឹង​អនុវត្ត។ ការ​គ្រប់គ្រង​ពេលវេលា​ឲ្យ​មាន​ប្រសិទ្ធភាព ទាមទារ​ឲ្យ​អ្នក​ស្គាល់​ច្បាស់​ពី​ខ្លួនឯង និង​អ្នកដទៃ។ សូម​ក្រឡេក​មើល​កាលវិភាគ​របស់​អ្នក​ថា តើ​អ្នក​មាន​ការ​អ្វី ខ្លះ​ដែល​ត្រូវ​ធ្វើ​ជាមួយ​មនុស្ស​ក្រោម​បង្គាប់​អ្នក? អ្នក​ត្រូវ​បែងចែក​ផែនការ​ការងារ​ទៅ​តាម​ពេល​នីមួយៗ​ឲ្យ​បាន​ច្បាស់លាស់​ដើម្បី​ឲ្យ​អ្នក​មាន​ពេលវេលា​ទំនេរ​មួយ​ចំនួន​មក​ជួយ​ពិនិត្យ​សកម្មភាព​ការងារ​របស់​ពួកគេ​វិញ។

៤.ការ​​ផ្ទេរ​​ភារកិច្ច​ការងារ​ដល់​ថ្នាក់​ក្រោម
ងាក​ទៅ​មើល​ការ​ផ្ទេរ​ភារកិច្ច​ការងារ​​ពី​ថ្នាក់​លើ​​មក​ថ្នាក់​ក្រោម​វិញ បុគ្គលិក ១១% និយាយ​ថា អ្នក​គ្រប់គ្រង​របស់​ពួកគេ​នៅ​តែ​មាន​ចំណុច​ខ្វះ​ខាត​ត្រង់​ចំណុច​នេះ។ ដូច​ទៅ​នឹង​ការ​គ្រប់គ្រង​ពេលវេលា​ដែរ ការ​ផ្ទេរ​ភារកិច្ច​ការងារ​ដល់​​បុគ្គលិក​ក្រោម​បង្គាប់ គឺ​ជា​ជំនាញ​ដ៏​ចាំបាច់​បំផុត​មួយ​​ក្នុង​ការ​ធានា​រាល់​ផ្នែក​ទាំងអស់​នៃ​ក្រុម​ការងារ​​ឲ្យ​ដំណើរការ​ទៅ​មុខ​ដោយ​​ភាព​រលូន។ អ្នក​ប្រហែល​កំពុង​ព្យាយាម​ធ្វើ​ការ​ងារ​រាប់​ជំពូក​ទាំង​នោះ​ដោយ​មិន​ទំនេរ​ដៃ ហើយ​អ្នក​ប្រហែល​ជា​ស្ទាក់ស្ទើរ​​មិន​ចង់​ទម្លាក់​ការងារ​ខ្លះ​ទៅ​ឲ្យ​បុគ្គលិក​របស់​អ្នក​ នេះ​ក៏ដោយសារតែ​អ្នក​ព្រួយបារម្ភ​ថា  សមត្ថភាព​របស់​ពួកគេ​នៅ​មាន​កម្រិត អ្នក​នៅ​មិន​ទាន់​មាន​ទំនុក​ចិត្ត ឬ​មិន​ចង់​ដាក់​បន្ទុក​លើ​ពួកគេ។ ទោះ​ជា​ក្នុង​រូបភាព​បែប​ណា​ក៏ដោយ ទាំង​នេះ​គឺ​ជា​ឧបសគ្គ​ធ្វើ​ឲ្យ​ការងារ​របស់​អ្នក​មិន​រីកចម្រើន​ទៅមុខ។ អ្វី​ដែល​សំខាន់​បំផុត​ដែល​អ្នក​ត្រូវ​យកចិត្ត​ទុកដាក់​នៅ​ពេល​នេះ គឺ​ត្រូវ​ផ្ដល់​ទំនុក​ចិត្ត​​ដល់​បុគ្គលិក​របស់​អ្នក ហើយ​ទម្លាក់​ការងារ​មួយ​ចំនួន​ឲ្យ​ពួកគេ​ធ្វើ​ជំនួស​អ្នក​។ អនុញ្ញាត​ឲ្យ​ពួកគេ​រៀន​ទទួលខុសត្រូវ ប៉ុន្តែ​ត្រូវ​ប្រគល់​ភារកិច្ច​ការងារ​ឲ្យ​ចំ​កន្លែង ឲ្យ​ចំ​មនុស្ស។ 

៥.ទំនាក់ទំនង
ការធ្វើ​​ទំនាក់ទំនង គឺ​ជា​ជំនាញ​​ចុងក្រោយ​ដែល​អ្នក​គ្រប់គ្រង​ខ្វះខាត​ជាងគេ​។ បុគ្គលិក ១០% និយាយ​ថា ថ្នាក់​ដឹកនាំ​របស់​ពួកគេ​ នៅ​មាន​ចន្លោះប្រហោង​ក្នុង​ការ​​ពង្រឹង​ជំនាញ​ទំនាក់ទំនង។ ខណៈ​ដែល​វា​ជា​ជំនាញ​សំខាន់​បំផុត​មួយ​​មិន​អាច​ខ្វះ​បាន​សម្រាប់​ការ​ទំនាក់ទំនង​រវាង​អ្នក​គ្រប់គ្រង និង​បុគ្គលិក ការ​ទំនាក់ទំនង​បាន​ដើរ​តួនាទី​កាន់តែ​សកម្ម​ឡើង​សម្រាប់​អ្នក​គ្រប់គ្រង​នៅ​លើ​ពិភពលោក​នា​ពេល​បច្ចុប្បន្ន​នេះ។ ប្រសិនបើ​អ្នក​ឆ្ងល់​ថា  តើ​​បុគ្គលិក​របស់​អ្នក​អាច​ទទួល​បាន​អត្ថប្រយោជន៍​​អ្វី​ខ្លះ​ពី​ការ​ទំនាក់ទំនង​ដ៏​ជាក់លាក់​មួយ អ្នក​គួរ​សាកសួរ​ពួកគេ​ភ្លាម។  អ្នក​ត្រូវ​ផ្ដល់​លទ្ធភាព​ឲ្យ​ខ្លួនឯង​​មាន​ពេលវេលា​គ្រប់គ្រាន់​ដើម្បី​ឆ្លើយ​​តប​នូវ​រាល់​សំនួរ ក្តី​កង្វល់ និង​ផ្ដល់​ដំណោះស្រាយ​​ជូន​ចំពោះ​ពួកគេ៕

ដោយ៖ Kevin
ប្រភព៖ Inc 

X
5s