ជំនាញសំខាន់ៗទាំង ១៣ ដែលយុវជនត្រូវចេះនៅ ក្នុងសតវត្សរ៍ទី២១នេះ
អ្នកអប់រំ និងអ្នកជំនាញនៅក្នុងវិស័យការងារតែងតែព្រមានថា យុវជនជំនាន់ក្រោយត្រូវការអភិវឌ្ឍជំនាញចាំបាច់មួយចំនួនសម្រាប់សតវត្សរ៍ទី ២១ នេះ។ បើគ្មានជំនាញទាំងនេះទេ អនាគតពួកគេនឹងមិនអាចចូលរួមក្នុងសកម្មភាពសេដ្ឋកិច្ចពិភពលោកប្រកបដោយភាពជោគជ័យបានទេ។ ពួកគេនឹងមិនអាចរៀបចំខ្លួនបានត្រឹមត្រូវ និងគ្រប់ជ្រុងជ្រោយសម្រាប់ជីវិតនៅក្នុងមហាវិទ្យាល័យ និងជីវិតការងារជាក់ស្ដែងបានឡើយ។
ប៉ុន្តែសំនួរសួរថា តើអ្វីទៅជាជំនាញដែលពួកគេត្រូវចេះនៅក្នុងសតវត្សរ៍ទី ២១នេះ? តើអត្ថបទនេះកំពុងនិយាយពីជំនាញកុំព្យូទ័រ និងបច្ចេកវិទ្យាមែនទេ? និងថា តើនរណាដែលបានដាក់ចំណាត់ថ្នាក់ជំនាញទាំងនេះទៅតាមលំដាប់លំដោយដែលយុវជនជំនាន់ក្រោយត្រូវចេះ? ចម្លើយរបស់អ្នកប្រហែលគឺវាអាស្រ័យថា តើអ្នកបានសួរនរណាខ្លះ?
ក៏ប៉ុន្តែបើយោងតាមរបាយការណ៍ស្រាវជ្រាវរបស់ក្រុមហ៊ុនស្រាវជ្រាវ Hanover (Hanover Research Report) ដែលមានចំណងជើងថា A Crosswalk of 21st Century Skills ឬ ជំនាញដែលត្រូវឆ្លងកាត់នៅសតវត្សរ៍ទី ២១នេះ បានវិភាគលើកយកជំនាញទាំងនោះមកបង្ហាញដូចតទៅ។
១) លើសពីជំនាញកុំព្យូទ័រ និងបច្ចេកវិទ្យា
របាយការណ៍ខាងលើបានលើកយកជំនាញសំខាន់ ៤ តាមលំដាប់លំដោយសម្រាប់អភិវឌ្ឍសមត្ថភាពរបស់យុវជនជំនាន់ក្រោយដែលក្នុងនោះរួមមាន៖
- ការសហការ និងការធ្វើការងារជាក្រុម (Collaboration and teamwork)
- ភាពច្នៃប្រឌិត និងការស្រមើស្រមៃ (Creativity and imagination)
- ការត្រិះរិះពិចារណា (Critical thinking)
- ដោះស្រាយបញ្ហា (Problem solving)។
របាយការណ៍ Hanover ខាងលើបានបញ្ជាក់ថា វាជារឿងចាំបាច់ដែលមនុស្សគ្រប់គ្នាត្រូវដឹងថា តើជំនាញទាំងនេះវាមានតម្លៃយ៉ាងណាសម្រាប់អ្នកដែលបញ្ចប់មហាវិទ្យាល័យភ្លាមៗ និងថៅកែក្រុមហ៊ុន និងថា តើជំនាញទាំងនេះវាមានប្រយោជន៍បែបណាសម្រាប់ការទំនាក់ទំនងគ្នាទៅវិញទៅមក។ ជំនាញនៅសតវត្សវិ៍ទី ២១ នេះ វាសំដៅទៅលើចំណេះដឹងខាងធ្វើមាតិកា (Content) អក្សរសាស្ត្រ និងចំណេះជំនាញសម្រាប់យុវជនម្នាក់ៗត្រៀមខ្លួនទប់ទល់ទៅនឹងការប្រកួតប្រជែងថ្មីៗ និងឱកាសដែលកំពុងកើតមាននៅលើពិភពលោកសព្វថ្ងៃនេះ។
២) ជំនាញសំខាន់ៗផ្សេងទៀតសម្រាប់ភាពជោគជ័យ
របាយការណ៍របស់ Hanover ខាងលើបានបង្ហាញពីជំនាញ ៤ ខាងក្រោមនេះដែលទាំងអស់នេះស្ថិតនៅក្នុងលំដាប់ថ្នាក់សំខាន់ទី ៥ ដែលក្នុងនោះរួមមាន៖
- ភាពបត់បែន និងការសម្របខ្លួន (Flexibility and adaptability)
- ដឹងសកល និងវប្បធម៌ (Global and cultural awareness)
- ដឹងផ្នែកសារព័ត៌មាន (Information literacy)
- ភាពជាអ្នកដឹកនាំ (Leadership)។
ចំណែកជំនាញ ៥ ទៀតដែលស្ថិតនៅក្នុងចំណាត់ថ្នាក់សំខាន់ទី ៦ នោះរួមមាន៖
- ចំណេះដឹងស៊ីវិល និងពលរដ្ឋសង្គម (Civic literacy and citizenship)
- ជំនាញទំនាក់ទំនងដោយផ្ទាល់មាត់ និងដោយការសរសេរ (Oral and written communication skills)
- ទំនួលខុសត្រូវសង្គម និងក្រមសីលធម៌ (Social responsibility and ethics)
- ចំណេះដឹងបច្ចេកវិទ្យា (Technology literacy)
- គំនិតផ្ដួចផ្ដើម (Initiative)៕
ដោយ៖ ខេវិន
ប្រភព៖ envisionexperience
