អ្នកជំនាញបង្ហាញគន្លឹះជំនាញចំនួន ៦ ធ្វើឲ្យអ្នកជោគជ័យលេចធ្លោជាងគេនៅកន្លែងការងារ
ភាពជាបុគ្គលិកល្អ និងលេចធ្លោជាងគេ មិនមែនជារឿងមួយងាយស្រួលនោះទេ។ វាទាមទារឲ្យមានធាតុផ្សំជាច្រើនដូចជា សមត្ថភាព ចំណេះដឹង ចំណេះធ្វើ គំនិតច្នៃប្រឌិត និងសីលធម៌ជាដើម។ នៅខាងក្រោមនេះ អ្នកនឹងបានសិក្សាលម្អិតបន្ថែមទៀតពីប្រធានបទនេះ។ ប្រសិនបើអ្នកជាបុគ្គលិក សូមអនុវត្តតាមចំណុចនីមួយៗ ហើយតាមដានខ្លួនឯងមួយរយៈ អ្នកនឹងសង្កេតថា លទ្ធផលរបស់អ្នកទទួលបានល្អប្រសើរជាងមុន។
១.មានគំនិតលេចធ្លោ មិនមែនផ្តោតតែទៅលើទង្វើល្អរបស់អ្នកទេ
ការផ្ដោតតែលើទង្វើល្អរបស់អ្នកមួយតែមួយមុខនៅកន្លែងការងារ មិនអាចជួយឲ្យអ្នកឡើងតំណែងបានទេ។ ភាពសកម្មក្នុងការផ្ដួចផ្ដើមគំនិត សំបូរគំនិតល្អៗ ភាពច្នៃប្រឌិត ការចូលរួមផ្តល់មតិយោបល់ និងគុណភាពការងាររបស់អ្នកទាក់ទងទៅនឹងមុខជំនួញប្រចាំថ្ងៃទៅវិញទេ ដែលធ្វើឲ្យអ្នកមានឱកាសអភិវឌ្ឍអាជីពការងាររបស់អ្នកបាន។
២.ភាពជាអ្នកចង់ចេះចង់ដឹង
ការចង់ចេះចង់ដឹងចង់ឃើញ មិនមែនជាសំនួរបែបច្រំដែលគ្មានប្រយោជន៍របស់អ្នកនោះទេ។ ការចង់ចេះចង់ដឹង គឺជាទម្លាប់មួយដែលបង្ហាញពីចំណាប់អារម្មណ៍ និងការលើកទឹកចិត្ត។ វាក៏ជាសកម្មភាពដែលបង្ហាញថា អ្នកជាមនុស្សឈានមុខគេក្នុងការបង្កើតឲ្យមមានភាពច្នៃប្រឌិត ជាពិសេសនៅកន្លែងធ្វើការ។ លោកបានណែនាំឲ្យអ្នកបង្កើតទម្លាប់មួយក្នុងការសួរសំណួរភ្លាមៗ ឬ បន្ទាប់ពីមានការវិភាគថ្លឹងថ្លែងបន្តិចរួចមក។ ការចង់ចេះចង់ដឹង និងទម្លាប់នៃការសួរសំនួរ អាចជួយឲ្យអ្នកបញ្ជ្រាបខ្លួនកាន់តែខ្លាំងឡើងទៅ នឹងគម្រោងការងារដែលមិនទាក់ទងនឹងអ្នក និងអាចស្នើគំនិតយោបល់បន្ថែមពីក្រុមការងារ។
៣.ជាអ្នកផ្តល់ថាមភាព និងជាអ្នកផ្តល់ដំណោះស្រាយ
អ្នកដែលជោគជ័យលេចធ្លោជាងគេ កម្រនឹងត្អូញត្អែរទៅនឹងបញ្ហាជាច្រើនដែលកើតមាននៅថ្ងៃធ្វើការដើមសប្តាហ៍នោះឡើយ។ ពួកគេ កម្រនឹងនិយាយបដិសេធន៍ ឬនិយាយឲ្យតែរួចពីខ្លួននៅពេលមានសំណើអ្វីមួយកើតមានឡើង។ ប៉ុន្តែបុគ្គលិកលក្ខណៈសំខាន់របស់មនុស្សប្រភេទនេះ គឺជាអ្នកដែលអាចផ្តល់ថាមភាព និងជាអ្នកផ្តល់ដំណោះស្រាយសម្រាប់គម្រោងការងាររបស់ក្រុមហ៊ុន។ ទន្ទឹមនឹងនេះ អ្នកទាំងនេះ គឺជាមនុស្សដែលមានផ្នត់គំនិតវិជ្ជមាន ពូកែប្រមូលផ្តុំគំនិតពីមនុស្សជុំវិញខ្លួន ឬជាអ្នកដែលបង្កើតគម្រោងផ្សេងៗ ហើយអាចសហការជាមួយក្រុមការងារដើម្បីអនុវត្ត និងលើកឡើងពីដំណោះស្រាយ។
៤.ហ៊ាននិយាយបដិសេធន៍ដោយមិនរុញរា
អ្នកដែលជោគជ័យលេចធ្លោជាងគេ មានព្រំដែនកំណត់របស់ខ្លួន។ ពួកគេមិនមែនចេះតែយល់ស្របរាល់ពេលដែលមានសំណើ ឬការផ្តល់គំនិតណាមួយពីក្រុមការងារនោះឡើយដែលផ្ទុយពីបុគ្គលិកធម្មតាដែលចូលចិត្តបង្កើតទម្លាប់មួយគឺចេះតែយល់ស្របគ្រប់ពេល។ ខុសពីបុគ្គលិកទូទៅដែលចូលចិត្ត ដោះសា គេចវេស ត្អូញត្អែរ បុគ្គលដែលមានសមត្ថភាពលេចធ្លោ មិនចាត់ទុកថា ខ្លួនឯងជាជនរងគ្រោះក្នុងបញ្ហាការងារឡើយ។ ពួកគេជាអ្នកជំរុញឲ្យមានការសម្រេចចិត្តត្រឹមត្រូវមួយរបស់អ្នកគ្រប់គ្រងលើគម្រោងការងារ និងបង្ហាញការបដិសេធន៍ដោយស្មោះត្រង់ ព្រមទាំងឆ្លើយតបដោយផ្តល់មូលហេតុ ឬមតិកែលំអដោយសមហេតុផល។
៥.អនុវត្តតាមគម្រោងការងារ និងសម្រេចលទ្ធផលបានជាទីគាប់ចិត្ត
បុគ្គលិកទាំងអស់នៅក្នុងក្រុមហ៊ុនសុទ្ធតែរួមចំណែកដល់ភាពជោគជ័យនៃគម្រោងការងារ។ ប៉ុន្តែខុសពីបុគ្គលិកទូទៅ បុគ្គលិកដែលលេចធ្លោ អនុវត្តការងារជាមួយនឹងការប្ដេជ្ញាចិត្តខ្ពស់ និងមានគោលដៅច្បាស់លាស់។ នេះបានជំរុញឲ្យខ្លួនសម្រេចបានលទ្ធផលដូចការគ្រោងទុក និងនាំមុខអ្នកដទៃជានិច្ច។
៦.គិតឲ្យបាន ២ជំហានមុនលើអាជីពការងាររបស់ខ្លួន
ស្របពេលដែលមនុស្សភាគច្រើនផ្តោតសំខាន់លើការងារប្រចាំថ្ងៃរបស់ខ្លួន បុគ្គលិកដែលលេចធ្លោ បានបង្កើតទស្សនវិស័យផ្ទាល់ខ្លួនមួយសម្រាប់អនាគតអាជីពការងាររបស់ខ្លួនឲ្យបានពីជំហានមុន។ បុគ្គលិកប្រភេទនេះបានត្រៀមខ្លួនរួចហើយថា តើខ្លួននឹងត្រូវកាន់តួនាទីបែបណាពីតំណែងបច្ចុប្បន្ន? ក្លាយជាអ្វីនៅពេលអនាគត? សម្រាប់អ្នកវិញ ក្នុងករណីនេះអ្នកអាចសម្រេចជោគជ័យបានលុះត្រាតែអ្នកមានភាពសកម្មទៅនឹងគម្រោងការងារណាដែលអ្នកយល់ថា មានសារសំខាន់សម្រាប់ឱកាសអភិវឌ្ឍអាជីពការងារនៅពេលអនាគតនោះ៕
ប្រភព៖ Businessinsider
