យុវជនជំនាន់ក្រោយគួរអានអត្ថបទនេះ មុនផ្ញើខ្លួនលើដងវិថីជំនួញ!
តើយុវជនសព្វថ្ងៃនេះមានភាពជាសហគ្រិនច្រើនជាងជំនាន់មុនមែនដែរឬទេ? នៅអង់គ្លេសគេរកឃើញថា យុវជនក្មេងៗដែលចាប់ផ្តើមធ្វើអាជីវកម្មបានកើនឡើងទ្វេដងនៅក្នុងរយៈពេល១៥ឆ្នាំចុងក្រោយនេះ។ ក្រុមហ៊ុន ComRes បានស្រាវជ្រាវទៅលើយុវជន ១.៥០០ នាក់ដែលមានអាយុចន្លោះពី ១៤-២៥ ឆ្នាំដែលជាផ្នែកមួយដើម្បីស្រាវជ្រាវពីការយល់ឃើញរបស់ពួកគេក្នុងវិស័យអាជីវកម្ម។
១.យុវជនមានសុទិដ្ឋិនិយមលើការធ្វើជំនួញ
ជារួមលទ្ធផលស្រាវជ្រាវរបស់ក្រុមហ៊ុនខាងលើបានបង្ហាញថា យុវជនក្មេងៗមានសុទិដ្ឋិនិយមចំពោះការធ្វើជាសហគ្រិន។ ប៉ុន្តែត្រឹមតែជាងពាក់កណ្ដាល (៥១%) ប៉ុណ្ណោះក្នុងចំណោមយុវជនទាំងនេះកំពុងពិចារណាចាប់ផ្តើម ឬបានចាប់ផ្តើមអាជីវកម្មរួចហើយ។ មួយភាគបីទៀត (៣៥%) និយាយថា ពួកគេមិនបានគិតអំពីវានោះទេ ប៉ុន្តែបើកចំហចំពោះគំនិតធ្វើជំនួញនេះ ខណៈដែល ១៥% ទៀតនិយាយថា ពួកគេមិនបានគិតអំពីវាទេ ហើយក៏មិនគិតថា ពួកគេនឹងចាប់ផ្តើមបើកអាជីវកម្មដែរ។
២.អាយុ និងការអប់រំមានឥទ្ធិពលដល់ការធ្វើជំនួញ
ការស្រាវជ្រាវបានបង្ហាញពីផលប៉ះពាល់នៃអាយុ និងការអប់រំមានឥទ្ធិពលលើភាពជាសហគ្រិនដោយយុវជនមានឆន្ទៈក្នុងការចាប់ផ្តើមអាជីវកម្មមានការកើនឡើងទៅតាមអាយុ។ យុវជនដែលមានអាយុពីចន្លោះ ១៤-១៧ ឆ្នាំមានត្រឹមតែ ៣៣% ប៉ុណ្ណោះគិតថា មានចំណាប់អារម្មណ៍ចង់ចាប់ផ្តើម ឬបានចាប់ផ្តើមអាជីវកម្ម ខណៈដែលតួលេខនេះបានកើនឡើងដល់ ៦០% នៅពេលពួកគេឈានដល់អាយុចន្លោះពី ២២-២៥ ឆ្នាំ។
ការអប់រំនៅសាកលវិទ្យាល័យ គឺជាការព្យាករណ៍មួយដ៏សំខាន់នៃចេតនាចង់ធ្វើជំនួញរបស់យុវជន។ យុវជនទំនងជាពិចារណាចាប់ផ្តើម ឬបានចាប់ផ្តើមបង្កើតក្រុមហ៊ុន ប្រសិនបើពួកគេបានឆ្លងកាត់ជីវិតសិក្សានៅថ្នាក់មហាវិទ្យាល័យបានប្រហែល (៦៥%) ឬបានបញ្ចប់ការសិក្សាពីសាកលវិទ្យាល័យ (៦៣%) បើប្រៀបធៀបទៅនឹងយុវជនដែលមានអាយុចន្លោះពី ១៨-២៥ ឆ្នាំដែលមិនបានចូលរៀននៅសាកលវិទ្យាល័យ (៥៣%)។
៣.គម្លាតរវាងបុរស និងស្ត្រីក្នុងការធ្វើ ជំនួញនៅតែមានគម្លាតខុសគ្នា
ស្រាវជ្រាវរបស់ក្រុមហ៊ុនដដែលបានរកឃើញពីគម្លាតយេនឌ័រនៅក្នុងវិស័យអាជីវកម្មនេះ។ យុវជនជាបុរស ផ្ដួចផ្ដើមធ្វើជំនួញច្រើនជាង២ដងបើប្រៀបធៀបទៅនឹងយុវជនជានារី ហើយអាជីវកម្មដែលមានស្ត្រីជាស្ថាបនិក មានការកើនឡើងត្រឹមតែ ៨% ប៉ុណ្ណោះ។ ទោះយ៉ាងណា ការស្ទង់មតិ គំនិតពិចារណាចង់ចាប់ផ្តើមធ្វើអាជីវកម្មរបស់បុរស និងស្ត្រី គឺស្ថិតនៅក្នុងអត្រាប្រហាក់ប្រហែលគ្នា (៤៥% ទល់នឹង ៤១%)។
៤.មានកត្តាពីរដែលបង្ហាញពីគម្លាតរវាងបុរស និងស្ត្រីនៅក្នុងវិស័យអាជីវកម្ម
ដំបូងនៅពេលគេស្នើឲ្យយុវជនទាំងនោះប្រាប់ឈ្មោះពីអ្នកជំនួញល្បីឈ្មោះណាមួយដែលជំរុញឲ្យពួកគេចង់ធ្វើជំនួញ។ ជិតពាក់កណ្តាល (៤៩%) នៃយុវជនក្មេងៗដែលមានអាយុចន្លោះពី ១៤-២៥ ឆ្នាំ បានលើកឡើងពីឈ្មោះបុគ្គលនោះ ខណៈដែលនារីវ័យក្មេងដែលមានអាយុចន្លោះពី១៤-២៥មានត្រឹមតែ១ភាគី៣ប៉ុណ្ណោះឬ ស្មើនឹង៣៥% នៃស្ត្រីទាំងនោះ។
ចំណែកការដាក់ឈ្មោះក្រុមហ៊ុនវិញ យុវជនស្ទើរតែទាំងអស់ (៨៥%) ដាក់ឈ្មោះដោយខ្លួនឯង ខណៈដែលនារីវ័យក្មេងមានតែ ១៥% ប៉ុណ្ណោះ។ ក្នុងចំណោមអ្នកទាំងនេះ អ្នកដែលមានសមាជិកគ្រួសារ សាច់ញាតិ ឬមិត្ត ភក្តិដែលជាម្ចាស់អាជីវកម្ម យុវជន ៧៤% ទល់នឹងនារីវ័យក្មេង ៦៤% ទំនងជាពិចារណាចាប់ផ្ដើមធ្វើអាជីវកម្ម ។
កត្តាទី២ នារីវ័យក្មេង៧១% ទល់នឹងយុវជន ៦៣% បានលើកឡើងថា ភាពភ័យខ្លាចទៅនឹងការបរាជ័យគឺជាឧបសគ្គមួយក្នុងការចាប់ផ្តើមធ្វើអាជីវកម្ម។ នេះអាចមានការពាក់ព័ន្ធទៅនឹងបញ្ហាកង្វះនរណាម្នាក់មកធ្វើជាអ្នកដឹកនាំ និងជាគំរូរបស់ពួកគេ។ ការចាប់ផ្តើមធ្វើអាជីវកម្មជាគោលការណ៍ នឹងមានការភ័យខ្លាចកាន់តែខ្លាំងនៅពេលដែលអ្នក ខ្វះការណែនាំពីនរណាម្នាក់ដូចជា គ្រូបណ្ដុះបណ្ដាល ឬ គ្រូបង្វឹកដើម្បីមកបង្ហាញផ្លូវដល់អ្នក។
៥.ឧបសគ្គក្នុងការចាប់ផ្តើមធ្វើជំនួញ
បើក្រឡេកមើលឲ្យវែងឆ្ងាយជាងនេះ ឧបសគ្គធំៗទាំងបីដែលរនាំងរារាំងយុវជនពីការចាប់ផ្តើមចេញរកស៊ីនោះរួមមាន មាន៧០% មិនដឹងថា ត្រូវចាប់ផ្ដើមរកស៊ីពីកន្លែងណា ៦៨% ខ្លាចបរាជ័យ និង ៦៧% និយាយថា ពួកគេអសមត្ថភាពក្នុងការរកមនុស្សឲ្យត្រូវ។
៦.មូលហេតុសំខាន់ៗដែលធ្វើឲ្យយុវជនក្មេងៗចង់បង្កើតមុខជំនួញ
ស្រាវជ្រាវរបស់ក្រុមហ៊ុនខាងលើក៏បានស្រាវជ្រាវពីអ្វីដែលជំរុញឲ្យយុវជនចាប់ផ្តើមមុខជំនួញផងដែរ។ ការស្រាវជ្រាវនេះរកឃើញថា យុវជនទាំងអស់ត្រូវបានលើកទឹកចិត្តឲ្យធ្វើជំនួញច្រើនជាងដើម្បីតែប្រាក់។ បំណងប្រាថ្នារបស់ពួកគឺ ៨៦% ចង់ធ្វើជាថៅកែខ្លួនឯង និង ៨៤% ចង់មានសេរីភាពធ្វើអ្វីដែលខ្លួនចង់ធ្វើដែលទាំងពីរនេះគឺជាហេតុផលធំបំផុតដែលធ្វើឲ្យយុវជនក្មេងៗទាំងនេះចង់ចាប់ផ្តើមធ្វើជំនួញ ឬកំពុងធ្វើជំនួញនៅក្នុងដៃ។ ហេតុផលសំខាន់ទី៣គឺ ៨៣% ដោយសារតែពួកគេមានមហិច្ឆតាស្រលាញ់គំនិតចង់បង្កើតមុខជំនួញរបស់ពួកគេ និងទី៤ មាន ៧៦% ចង់ចូលរួមធ្វើឲ្យពិភពលោកកាន់តែប្រសើរឡើង៕
អត្ថបទដែលទាក់ទង៖
- ជីវិតអាជីវកម្មសម័យបច្ចុប្បន្ន មិនអាចរស់ខ្វះ Digital Marketing បានទេ
- តើអ្នកចាត់ទុកថា ការរកលុយគួរតែជាគោលដៅចុងក្រោយរបស់អ្នកដែរឬទេ?
ប្រែសម្រួល៖ ខេវិន
ប្រភព៖ elitebusinessmagazine
